ഏത് പാട്ടിനാണ് അവാര്‍ഡ് ലഭിച്ചതെന്ന് അറിയില്ലായിരുന്നു, ഏത് സിനിമയാണെന്നും അറിയില്ല, മകള്‍ വിളിച്ചുപറഞ്ഞപ്പോഴാണ് അറിയുന്നത്, കുറേ നാളായിട്ടുള്ള ആഗ്രഹം ഇപ്പോഴെങ്കിലും സാധിച്ചു, എല്ലാത്തിനും അതിന്റേതായ സമയമുണ്ട്: വിദ്യാധരന്‍ മാസ്റ്റര്‍

 ‘ജനനം 1947 പ്രണയം തുടരുന്നു’ എന്ന ചിത്രത്തിലെ പതിരാണെന്നോര്‍ത്തൊരു കനവില്‍ എന്ന ഗാനത്തിലൂടെ മികച്ച പിന്നണി ഗായകനുള്ള സംസ്ഥാന ചലച്ചിത്ര പുരസ്‌കാരം സ്വന്തമാക്കിയിരിക്കുകയാണ് വിദ്യാധരന്‍ മാസ്റ്റര്‍. ആദ്യമായി അവാര്‍ഡ് കിട്ടിയതിന്റെ സന്തോഷത്തില്‍ അദ്ദേഹത്തിന്റെ പ്രതികരണമിങ്ങനെ…
” ഏത് പാട്ടിനാണ് അവാര്‍ഡ് ലഭിച്ചതെന്ന് അറിയില്ലായിരുന്നു. നിരവധി പാട്ടുകള്‍ക്ക് സംഗീതം നല്‍കുകയും പാടുകയും ചെയ്യുന്നുണ്ട്. പാട്ട് കഴിഞ്ഞാല്‍ പിന്നെ ആ കാര്യം വിടും. ഏത് സിനിമയാണെന്നും അറിയില്ല. മകള്‍ വിളിച്ചുപറഞ്ഞപ്പോഴാണ് അവാര്‍ഡ് വിവരം അറിയുന്നത്.
വളരെ സന്തോഷമുണ്ട്. കുറേ നാളായിട്ടുള്ള ആഗ്രഹം ഇപ്പോഴെങ്കിലും സാധിച്ചു. എല്ലാത്തിനും അതിന്റേതായ സമയമുണ്ട്. പാട്ടുകാരനാവാന്‍ ആഗ്രഹിച്ചയാളല്ല. വ്യത്യസ്തമായി എന്റേതായ രീതിയില്‍ പാട്ടുണ്ടാക്കുകയാണ് ചെയ്യുന്നത്. എന്റെ പാട്ടുകള്‍ എന്റേത് മാത്രമായിരിക്കും…”