തീരത്ത് ആശങ്ക ; മത്സ്യ ലഭ്യത താഴേക്ക്

വൈപ്പിൻ∙ മത്സ്യ ലഭ്യത താഴേക്ക്. കഴിഞ്ഞ ദിവസങ്ങളിൽ കടലിൽ ഇറങ്ങിയ ബോട്ടുകളിൽ  പലതും തിരിച്ചെത്തിയത് വെറുംകയ്യോടെ.കലവ ഇനത്തിലും മറ്റുമുള്ള വലുപ്പം കുറഞ്ഞ മീനുകളാണ് പല ബോട്ടുകൾക്കും കുറഞ്ഞ അളവിൽ കിട്ടിയത്. ഇന്ധനം, ഐസ് തുടങ്ങിയവയ്ക്ക് ചെലവിട്ട പണം പോലും പല ബോട്ടുകൾക്കും ലഭിച്ചില്ലെന്ന് തൊഴിലാളികൾ പറയുന്നു.
അതേസമയം ഫൈബർ വഞ്ചികൾക്കും മറ്റും താരതമ്യേന മെച്ചപ്പെട്ട തോതിൽ മീൻ കിട്ടുന്നുണ്ട്. കുടുത, ചെമ്പാൻ ഇനങ്ങളിൽ  പെട്ട മീനുകളാണ് പല വഞ്ചിക്കാർക്കും കിട്ടിയത്. കേരളത്തിലെ തെക്കൻ ജില്ലകളിൽ നിന്നുള്ളവരും കന്യാകുമാരി സ്വദേശികളുമാണ്  കൂടുതലായും ഫൈബർ വഞ്ചികളിൽ കടലിൽ ഇറങ്ങുന്നത്. ഇവർക്ക് കിട്ടുന്ന മീൻ എത്തുന്നതിനാൽ പ്രാദേശിക വിപണിയിൽ ക്ഷാമം  അനുഭവപ്പെടുന്നില്ല.