ലെജന്‍ഡ്‌സ് ചാംപ്യന്‍ഷിപ്പ് ഫൈനല്‍: പാകിസ്ഥാനെ എറിഞ്ഞിട്ട് ഇന്ത്യ! യുവരാജിനും സംഘത്തിനും കുഞ്ഞന്‍ വിജയലക്ഷ്യം
ലണ്ടന്‍: ലോക ലെജന്‍ഡ്‌സ് ചാംപ്യന്‍ഷിപ്പിന്റെ ഫൈനലില്‍ പാകിസ്ഥാനെതിരെ ഇന്ത്യക്ക് കുഞ്ഞന്‍ വിജയലക്ഷ്യം. ടോസ് നേടി ബാറ്റിംഗ് തിരഞ്ഞെടുത്ത പാകിസ്ഥാന്‍ ചാംപ്യന്‍സിനെ ഇന്ത്യ ചാംപ്യന്‍സ് ആറിന് 156 എന്ന നിലയില്‍ ഒതുക്കുകയായിരുന്നു. മൂന്ന് വിക്കറ്റ് നേടിയ അനുരീത് സിംഗാണ് പാകിസ്ഥാനെ തകര്‍ത്തത്. 36 പന്തില്‍ 41 റണ്‍സെടുത്ത ഷൊയ്ബ് മാലിക്കാണ് പാകിസ്ഥാന്റെ ടോപ് സ്‌കോറര്‍. ഗ്രൂപ്പ് ഘട്ടത്തില്‍ ഇരു ടീമുകളും നേര്‍ക്കുനേര്‍ വന്നപ്പോള്‍ പാകിസ്ഥാന്‍ 68 റണ്‍സിന് ജയിച്ചിരുന്നു.
മോശമായിരുന്നു പാകിസ്ഥാന്റെ തുടക്കം. അഞ്ച് ഓവറില്‍ രണ്ടിന് 46 എന്ന നിലയിലേക്ക് പാകിസ്ഥാന്‍ വീണിരുന്നു. ഷര്‍ജീല്‍ ഖാന്‍ (12), ഷൊയ്ബ് മക്‌സൂദ് (21) എന്നിവരാണ് പുറത്തായത്. സ്‌കോര്‍ബോര്‍ഡില്‍ 68 റണ്‍സുള്ളപ്പോള്‍ ഓപ്പണര്‍ കമ്രാന്‍ അക്മല്‍ (24) മടങ്ങി. ക്യാപ്റ്റന്‍ യൂനിസ് ഖാനും (7) തിളങ്ങാനായില്ല. ഇതോടെ നാലിന് 79 എന്ന നിലയിലായി പാകിസ്ഥാന്‍. മാലിക്ക് ഒരറ്റത്ത് പിടിച്ചുനിന്നത് മാത്രമാണ് പാകിസ്താന് ആശ്വാസമായത്. മിസ്ബാ ഉല്‍ ഹഖിനെ (18) കൂട്ടുപിടിച്ച് 47 റണ്‍സ് മാലിക്ക് കൂട്ടിചേര്‍ത്തു.
എന്നാല്‍ മിസ്ബ റിട്ടയേര്‍ ചെയ്തു. 18-ാം ഓവറില്‍ മാലിക്ക് പുറത്താവുകയും ചെയ്തു. ആമേര്‍ യാമിനാണ് (7) പുറത്തായ മറ്റൊരു താരം ഷാഹിദ് അഫ്രീദി (4), സൊഹൈല്‍ തന്‍വീര്‍ (19) പുറത്താവാതെ നിന്നു. അനുരീതിന് പുറമെ വിനയ് കുമാര്‍, പവന്‍ നേഗി, ഇര്‍ഫാന്‍ പത്താന്‍ എന്നിവര്‍ ഓരോ വിക്കറ്റ് വീഴ്ത്തി.
പാകിസ്ഥാന്‍: കമ്രാന്‍ അക്മല്‍ (വിക്കറ്റ് കീപ്പര്‍), ഷര്‍ജീല്‍ ഖാന്‍, സൊഹൈബ് മഖ്‌സൂദ്, ഷൊയ്ബ് മാലിക്, യൂനിസ് ഖാന്‍ (ക്യാപ്റ്റന്‍), ഷാഹിദ് അഫ്രീദി, മിസ്ബാ ഉള്‍ ഹഖ്, ആമര്‍ യാമിന്‍, സൊഹൈല്‍ തന്‍വീര്‍, വഹാബ് റിയാസ്, സൊഹൈല്‍ ഖാന്‍.
ഇന്ത്യ: റോബിന്‍ ഉത്തപ്പ (വിക്കറ്റ് കീപ്പര്‍), അമ്പാട്ടി റായിഡു, സുരേഷ് റെയ്ന, യുവരാജ് സിംഗ് (ക്യാപ്റ്റന്‍), യൂസഫ് പത്താന്‍, ഇര്‍ഫാന്‍ പത്താന്‍, പവന്‍ നേഗി, വിനയ് കുമാര്‍, ഹര്‍ഭജന്‍ സിംഗ്, രാഹുല്‍ ശുക്ല, അനുരീത് സിംഗ്.