കൊച്ചി: ആലപ്പുഴ പാര്‍ലമെന്റ് മണ്ഡലത്തിലെ ഇരട്ട വോട്ടുകള്‍ പോള്‍ ചെയ്യാതിരിക്കാന്‍ കര്‍ശന നടപടി സ്വീകരിക്കണമെന്ന് കേരള ഹൈക്കോടതിയുടെ ഇടക്കാല ഉത്തരവ്. ഇരട്ടവോട്ട് സംബന്ധിച്ച് യു.ഡി.എഫ് നല്‍കിയ ഹര്‍ജിയിലാണ് ഹൈക്കോടതിയുടെ ഉത്തരവ്.
ആലപ്പുഴ ലോക്‌സഭാ മണ്ഡലത്തില്‍ മാത്രം 35000 ത്തില്‍ കൂടുതല്‍ ഇരട്ട വോട്ടുകള്‍ ഉള്ളതായും അവയില്‍ 711-ഓളം ഒരേ വോട്ടര്‍ ഐഡി കാര്‍ഡുള്ള വോട്ടര്‍മാര്‍ ഉള്ളതായും യു.ഡി.എഫ് കണ്ടെത്തിയതിനെ തുടര്‍ന്നാണ് കേരള ഹൈക്കോടതിയില്‍ ഇതിനെതിരെ ഹര്‍ജി ഫയല്‍ ചെയ്തത്.
ഹര്‍ജി ഫയലില്‍ സ്വീകരിച്ച ഹൈക്കോടതി ഇലക്ഷന്‍ കമ്മീഷനോട് വിശദീകരണം തേടിയിരുന്നു. യുഡിഎഫിന്റെ ആക്ഷേപം പൂര്‍ണ്ണമായി നിഷേധിക്കാതെയാണ് അതിന് ഹൈക്കോടതിയില്‍ തിരഞ്ഞെടുപ്പ് കമ്മീഷന് സത്യവാങ്മൂലം നല്‍കിയത്.
യുഡിഎഫ് തെളിവായി സമര്‍പ്പിച്ച ഇരട്ട വോട്ടുകളുടെ ലിസ്റ്റ് ബന്ധപ്പെട്ട ഇലക്ടറല്‍ രജിസ്‌ട്രേഷന്‍ ഓഫീസര്‍മാര്‍ക്ക് കൈമാറിയിട്ടുണ്ടെന്നും അവയില്‍ ഇരട്ട വോട്ടുകളുണ്ട് എന്ന് ബോധ്യപ്പെട്ടാല്‍ അവ ബന്ധപ്പെട്ട പ്രിസൈഡിങ് ഓഫീസര്‍മാര്‍ക്ക് കൈമാറുകയും ഇരട്ട വോട്ടുകള്‍ ചെയ്യാതിരിക്കുവാനുള്ള കര്‍ശന നടപടികള്‍ സ്വീകരിക്കുമെന്നും ഇലക്ഷന്‍ കമ്മീഷന് ഹൈക്കോടതിയെ അറിയിച്ചു.
ഇതിനെ തുടര്‍ന്ന് ഇരട്ട വോട്ട് ഉള്ളവര്‍ ഒന്നില്‍ കൂടുതല്‍ സ്ഥലങ്ങളില്‍ വോട്ട് ചെയ്യാതിരിക്കുവാനുള്ള കര്‍ശന നടപടി സ്വീകരിക്കാന്‍ തിരഞ്ഞെടുപ്പ് കമ്മീഷന് ഹൈക്കോടതി നിര്‍ദ്ദേശം നല്‍കികൊണ്ട് ഹൈക്കോടതി ഉത്തരവ് ഇറക്കിയത്. യുഡിഎഫ് സ്ഥാനാര്‍ഥി കെ സി വേണുഗോപാലിനുവേണ്ടി ചീഫ് ഇലക്ഷന്‍ ഏജന്റായ അഡ്വ എം ലിജുവാണ് ഹൈക്കോടതിയില്‍ ഹര്‍ജി ഫയല്‍ ചെയ്തത്.
ആലപ്പുഴ ലോക്‌സഭാ മണ്ഡലത്തില്‍ മാത്രം 35000 ത്തില്‍ കൂടുതല്‍ ഇരട്ട വോട്ടുകള്‍ ! കള്ളവോട്ട് തടയാൻ കർശന നിർദ്ദേശവുമായി ഹൈക്കോടതി; ഇരട്ട വോട്ടുകള്‍ക്കെതിരെ ഇടക്കാല ഉത്തരവ്
Byadmin
Apr 25, 2024