കൈനാട്ടി മേല്‍പാലത്തിന് സമീപം യുവാവിനെ മരിച്ച നിലയില്‍ കണ്ടെത്തിയ സംഭവം: ഒരാള്‍ അറസ്റ്റില്‍

വടകര: ചോറോട് കൈനാട്ടി മേല്‍പാലത്തിന് സമീപം യുവാവിനെ മരിച്ച നിലയില്‍ കണ്ടെത്തിയ സംഭവത്തില്‍ ഒരാള്‍ അറസ്റ്റില്‍.ഏറാമലയിലെ എടോത്ത് മീത്തല്‍ വിജീഷി(33)നെനെയാണ് അറസ്റ്റ് ചെയ്തത്. 
വടകര താഴെ അങ്ങാടി വലിയവളപ്പ് കരകെട്ടി ചെറിയകണ്ടി ഫാസില്‍ (39) മരിച്ച സംഭവത്തിലാണ് അറസ്റ്റ്. 2023 സപ്തംബര്‍ 13ന് ബുധനാഴ്ച രാവിലെ ആറിനാണ് ഫാസില്‍ കൈനാട്ടി മേല്‍പ്പാലത്തിന് സമീപം മരിച്ച നിലയില്‍ കാണപ്പെട്ടത്.
മരണത്തിന് അഞ്ച് ദിവസം മുമ്പാണ് ബഹ്‌റൈനില്‍ നിന്ന് ഇയാള്‍ നാട്ടിലെത്തിയത്. പ്രഭാത സവാരിക്കിറങ്ങിയവരാണ് മൃതദേഹം കണ്ടത്. തൊട്ടടുത്ത് ചോര പുരണ്ട നിലയില്‍ ഇയാളുടെ ആക്ടീവ സ്‌കൂട്ടറുമുണ്ടായിരുന്നു. മൂക്കില്‍ നിന്നും വായില്‍ നിന്നും ചെവിയില്‍ നിന്നും രക്തം പുറത്തേക്ക് ഒലിച്ചിറങ്ങിയ നിലയിലായിരുന്നു.
മയക്ക് മരുന്ന് അമിതമായി കുത്തി വച്ചതിനെത്തുടര്‍ന്നായിരുന്നു മരണം. മയക്കുമരുന്ന് സംഘത്തില്‍ ഇയാളോടൊപ്പം കൂടുതല്‍ പേരുണ്ടെന്ന് പോലീസിന് സംശയമുണ്ടായിരുന്നു. തുടര്‍ന്ന് നടത്തിയ അന്വേഷണത്തില്‍ മൂന്ന് പേര്‍ക്കെതിരെ വടകര പോലീസ് നരഹത്യക്ക് കേസെടുത്തിരുന്നു.
കഴിഞ്ഞ ദിവസം ഏറാമല കുന്നുമ്മക്കരയില്‍ മയക്കുമരുന്ന് സംഘത്തില്‍പ്പെട്ട രണ്ട് പേരെ മരിച്ച നിലയില്‍ കണ്ടെത്തിയ സംഭവത്തിനു ശേഷം നടത്തിയ അന്വേഷണത്തിലാണ് മയക്കുമരുന്ന് സംഘത്തില്‍പ്പെട്ട വിജീഷിനെപ്പറ്റി വിവരങ്ങള്‍ ലഭിച്ചത്. ഇയാളെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് ഫാസിലിന്റെ മരണവുമായി ബന്ധപ്പെട്ട ചുരുളഴിയുന്നത്. കുന്നുമ്മക്കരയിലെ വിജീഷിന്റെ വീട്ടില്‍ വച്ചാണ് മരണപ്പെട്ട ഫാസില്‍ മയക്കുമരുന്ന് കുത്തി വച്ച് അബോധാവസ്ഥയിലായത്.
ആശുപത്രിയില്‍ എത്തിക്കാന്‍ വിജീഷും മറ്റു രണ്ടു പേരും വാഹനത്തില്‍ കയറ്റിയ ശേഷം ആശുപത്രിയില്‍ എത്തിക്കാതെ കൈനാട്ടിയിലെ മേല്‍പ്പാലത്തിന് താഴെ ഫാസിലിനെ തള്ളുകയായിരുന്നു. കുന്നുമ്മക്കരയിലെ മയക്കുമരുന്ന് സംഘത്തിലെ പ്രധാന കണ്ണികളിലൊരാളാണ് വിജീഷ് എന്ന് പോലീസ് പറഞ്ഞു.