ന്യൂഡൽഹി: തിഹാർ ജയിലിനുള്ളിൽ അരവിന്ദ് കെജ്‌രിവാൾ സാവധാനത്തിലുള്ള മരണത്തിലേക്ക് തള്ളിവിടുകയാണെന്ന്‌ എഎപി നേതാവ് സൗരഭ് ഭരദ്വാജ്. കെജ്‌രിവാളിൻ്റെ ജയിലിനുള്ളിൽ ഡോക്ടറുടെ കൺസൾട്ടേഷനും ഇൻസുലിനും അനുവദിക്കണമെന്ന് ആവശ്യപ്പെട്ടുള്ള എഎപിയുടെ ഹർജിയിൽ വിധി പ്രസ്താവിക്കുന്നത് ഡൽഹി കോടതി മാറ്റിവച്ചതിന് തൊട്ടുപിന്നാലെയാണ് ഈ പരാമർശം.
ടൈപ്പ്-2 പ്രമേഹബാധിതനായ അരവിന്ദ് കെജ്‌രിവാളിന് ജയിൽ ഭരണകൂടം ഇൻസുലിൻ നിഷേധിക്കുകയാണെന്ന ആരോപണം എഎപി നേതാവ് ആവർത്തിച്ചു. അരവിന്ദ് കെജ്‌രിവാളിന് ഇൻസുലിൻ നിഷേധിച്ചതിന് തിഹാർ ഭരണകൂടത്തെയും ബിജെപിയെയും കേന്ദ്രത്തെയും ഭരദ്വാജ് വിമർശിച്ചു. അവയവങ്ങള്‍ക്ക് കേടുപാടുകള്‍ വരുത്തി കെജ്‌രിവാളിനെ കൊലപ്പെടുത്താന്‍ ശ്രമിക്കുന്നുവെന്നാണ് എഎപിയുടെ ആരോപണം.
ഷുഗര്‍ വര്‍ധിപ്പിച്ച് മെഡിക്കല്‍ ജാമ്യം ലഭിക്കുന്നതിനായി അരവിന്ദ് കെജ്‌രിവാൾ മാമ്പഴം, ആലു-പൂരി, പഞ്ചസാരയിട്ട ചായ എന്നിവ കഴിച്ചിരുന്നുവെന്ന് ഈ ആഴ്ച ആദ്യം എൻഫോഴ്‌സ്‌മെൻ്റ് ഡയറക്ടറേറ്റ് പറഞ്ഞിരുന്നു.
ജാമ്യത്തിനായി പക്ഷാഘാതം വരുത്താൻ ഡൽഹി മുഖ്യമന്ത്രി ആഗ്രഹിക്കുന്നില്ലെന്ന് അരവിന്ദ് കെജ്‌രിവാളിന് വേണ്ടി ഹാജരായ അഭിഭാഷകൻ അഭിഷേക് മനു സിങ്‌വി വെള്ളിയാഴ്ച ഒരു ഹിയറിംഗിൽ പറഞ്ഞു. കെജ്‌രിവാളിന്റെ വസതിയില്‍നിന്ന് 48 തവണ ജയിലിലെത്തിച്ച ഭക്ഷണത്തില്‍ മൂന്ന് മാമ്പഴം മാത്രമാണ് ഇതുവരെ ഉണ്ടായിരുന്നതെന്നും സിങ്‌വി കോടതിയെ അറിയിച്ചു.
“അരവിന്ദ് കെജ്‌രിവാൾ ചായയിൽ ‘ഷുഗര്‍ ഫ്രീ’ മാത്രമേ ഉപയോഗിക്കുന്നുള്ളൂ. ഇഡിയുടെ പ്രസ്താവനകൾ തികച്ചും വ്യാജവും ദുരുദ്ദേശ്യപരവുമാണ്”-സിങ്‌വി കോടതിയില്‍ പറഞ്ഞു. തൻ്റെ ഡോക്ടർ തയ്യാറാക്കിയ ഡയറ്റ് ചാർട്ട് അനുസരിച്ചാണ് താൻ ഭക്ഷണം കഴിച്ചിരുന്നതെന്ന് കെജ്‌രിവാൾ അവകാശപ്പെട്ടു.
‘അവയവങ്ങള്‍ തകരാറിലാക്കാന്‍ ശ്രമം; കെജ്‌രിവാളിനെ സാവധാനത്തില്‍ മരണത്തിലേക്ക് തള്ളിവിടുന്നു’ ! ഗുരുതര ആരോപണവുമായി ആം ആദ്മി പാര്‍ട്ടി
Byadmin
Apr 20, 2024