ഭരണഘടനയിലെ 162-ാം അനുച്ഛേദം സ്വന്തം ഇഷ്ടപ്രകാരം വ്യാഖ്യാനിച്ച് സർക്കാരിന്റെ വിവാദ ഉത്തരവ്. യൂണിവേഴ്സിറ്റികളിൽ വി.സിമാരെ നിയമിക്കാനുള്ള സെർച്ച് കമ്മിറ്റി സ്വന്തം നിലയിൽ രൂപീകരിച്ചു. ഗവ‌ർണർക്കാണ് അധികാരമെന്ന സുപ്രീംകോടതി ഉത്തരവ് വകവയ്ക്കാതെയുള്ള നീക്കം. ലക്ഷ്യം വി.സി നിയമനക്കേസ് നിയമക്കുരുക്കിലാക്കൽ. ഗവർണറും സർക്കാരും വീണ്ടും നേർക്കുനേർ

തിരുവനന്തപുരം: ഗവർണർ ആരിഫ് മുഹമ്മദ് സെപ്തംബറിൽ തീരും വരെ കേരളത്തിൽ ഒരു യൂണിവേഴ്സിറ്റിയിലും വൈസ്ചാൻസലർ നിയമനം നടത്താതിരിക്കാൻ തന്ത്രങ്ങളുമായി മുന്നോട്ടു പോവുകയാണ് സർക്കാർ. ഇതിന്റെ ഭാഗമായാണ് ടെക്നോളജി യൂണിവേഴ്സിറ്റിയിൽ കഴിഞ്ഞ ദിവസം സർക്കാർ സ്വന്തം നിലയിൽ വി.സി നിയമനത്തിന് സെർച്ച് കമ്മിറ്റിയുണ്ടാക്കിയത്. കമ്മിറ്റിയിൽ ഒരു അംഗത്തെപ്പോലും നിശ്ചയിച്ചിട്ടില്ല. പിന്നീട് തീരുമാനിക്കുമെന്നാണ് ഉത്തരവിലുള്ളത്. ഈ ഉത്തരവ് ഹൈക്കോടതിയിൽ ഹാജരാക്കി വി.സി നിയമനക്കേസ് നീട്ടുകയെന്നതാണ് സർക്കാരിന്റെ തന്ത്രം.
യഥാർത്ഥത്തിൽ വി.സി നിയമനത്തിന് സർക്കാരിനല്ല, ഗവർണർക്കാണ് അധികാരമെന്ന് സുപ്രീംകോടതി പല ഉത്തരവുകളിലൂടെ വ്യക്തമാക്കിയതാണ്. കണ്ണൂർ വി.സിയായിരുന്ന ഗോപിനാഥ് രവീന്ദ്രനെ പുറത്താക്കിയ ഉത്തരവിലും ചാൻസലറാണ് വൈസ്ചാൻസലർ നിയമനത്തിനുള്ള അധികാരിയെന്ന് സുപ്രീംകോടതി എടുത്തുപറഞ്ഞതാണ്.
 വി.സി നിയമനത്തിൽ ഗവർണറുടെ തീരുമാനം അന്തിമമാണെന്നും ചാൻസലർ എന്നത് വെറും സ്ഥാനപ്പേരല്ല, യൂണിവേഴ്സിറ്റിയിൽ പ്രധാന ചുമതലയാണെന്നും കോടതി ഓർമ്മിപ്പിച്ചിട്ടുണ്ട്. ചാൻസലറും സംസ്ഥാന സർക്കാരുമായി കൃത്യമായ വേർതിരിവ് നിയമത്തിലുണ്ടെന്നും മറ്റാരുടെയെങ്കിലും താത്പര്യം, ആജ്ഞ എന്നിവ ഗവർണർ അനുസരിച്ചാൽ നിയമവിരുദ്ധമാണെന്നുമാണ് സുപ്രീംകോടതി ഉത്തരവ്. ഇതൊന്നും വകവയ്ക്കാതെയാണ് സർക്കാരിന്റെ ഉത്തരവ്.
 വി.സി നിയമനത്തിന് നിലവിലെ മൂന്നംഗ സെർച്ച്കമ്മിറ്റിക്ക് പകരം രണ്ട് സർക്കാർ പ്രതിനിധികൾ ഉൾപ്പെടെ അഞ്ചംഗ കമ്മിറ്റിയാക്കാൻ കൊണ്ടുവന്ന ബില്ലിന് രാഷ്ട്രപതി അനുമതി നിരാകരിച്ചിരുന്നു. ഇതോടെ, നിയമമാവാതെ കാലഹരണപ്പെട്ട ബില്ലിലെ വ്യവസ്ഥകൾ പ്രകാരമാണ് അഞ്ചംഗ കമ്മിറ്റി രൂപീകരിച്ചത്. 9 യൂണിവേഴ്സിറ്രികളിൽ വി.സിമാരെ നിയമിക്കണമെന്ന ഹർജി  ഹൈക്കോടതി പരിഗണിക്കാനിരിക്കെയാണ് കമ്മിറ്റിയംഗങ്ങളെപ്പോലും നിശ്ചയിക്കാതെയുള്ള ഉത്തരവ്. ഭരണഘടനയുടെ 162-ാം അനുച്ഛേദപ്രകാരം ഇത് സർക്കാരിന്റെ അധികാരപരിധിയിലാണെന്ന് വ്യാഖ്യാനിച്ചാണ് ഉത്തരവ്.
നിയമനത്തിലെ അപാകത കാരണം 2022ഒക്ടോബറിൽ സാങ്കേതിക വി.സി ഡോ.എം.എസ്.രാജശ്രീയെ സുപ്രീംകോടതി പുറത്താക്കിയതാണ്. ഗവർണർ പലവട്ടം ആവശ്യപ്പെട്ടിട്ടും യൂണിവേഴ്സിറ്റി സെർച്ച്ക മ്മിറ്റി പ്രതിനിധിയെ നൽകിയില്ല. യു.ജി.സി, വാഴ്സിറ്റി, ചാൻസലർ എന്നിവരുടെ പ്രതിനിധികളാണ് കമ്മിറ്റിയിലുണ്ടാവേണ്ടത്. യു.ജി.സി, ഉന്നതവിദ്യാഭ്യാസ കൗൺസിൽ ഉപാദ്ധ്യക്ഷൻ, സിൻഡിക്കേറ്റ് എന്നിവരുടെ ഓരോ പ്രതിനിധികളും സർക്കാരിന്റെ രണ്ട് പ്രതിനിധികൾ എന്നിവരാണ് സർക്കാരിന്റെ കമ്മിറ്റിയിലുള്ളത്. സർക്കാർ പ്രതിനിധികളുടെ ഭൂരിപക്ഷത്തിൽ വേണ്ടപ്പെട്ടവരെ വി.സിയാക്കാനാണ് സർക്കാരിന്റെ ശ്രമം. ഉത്തരവിനെ ഗവർണർ കോടതിയിൽ എതിർക്കും. 
നിയമന അധികാരിയായ ഗവർണർ രൂപീകരിക്കേണ്ട വിസി  നിയമനത്തിനുള്ള സെർച്കമ്മിറ്റി സർക്കാർ രൂപീകരിച്ചുകൊണ്ട് ഉത്തരവ് ഇറക്കിയത് പുതിയ നിയമക്കുരുക്കിലൂടെ വിസി നിയമനം, ഗവർണറുടെ കാലാവധി കഴിയുന്നതുവരെ നീട്ടുക എന്ന ലക്ഷ്യം വച്ചാണെന്നാണ ആരോപണം. സർവകലാശാലകളുടെ ഭരണത്തിൽ സർക്കാർ ഇടപെടുന്നത് ഒഴിവാക്കാനാണ് ഗവർണറെ ചാൻസലർ പദവിയിൽ വച്ചുള്ള നിയമ നിർമാണം നടത്തിയിട്ടുള്ളത്.
ചാൻസലറുടെ അധികാരത്തിൽ ബാഹ്യശക്തികളുടെ ഇടപെടൽ പാടില്ല എന്ന് സുപ്രീം കോടതി കണ്ണൂർ വിസി ഡോ. ഗോപിനാഥ് രവീന്ദ്രന്റെ നിയമനം റദ്ദാക്കിയ സുപ്രധാന വിധിയിൽ വ്യക്തമാക്കിയിട്ടുള്ളതാണ്. നിയമന അധികാരിയായ ചാൻസലർക്ക് മാത്രമേ സെലെക്ഷൻ കമ്മിറ്റി രൂപീകരിക്കാൻ അധികാരമുള്ളൂവെന്നത് ഇതോടെ വ്യക്തമാണ്. മുൻപ് മലയാളം സർവകലാശാല വിസി നിയമനത്തിന് സെർച്ച്‌ കമ്മിറ്റി രൂപീകരിക്കാൻ നോമിനിയെ നൽകാൻ സർക്കാർ ആവശ്യപ്പെട്ടെങ്കിലും അത് നിയമവിരുദ്ധമായതിനാൽ രാജ്ഭവൻ ആ ആവശ്യം നിരസിച്ചതാണ്.
കഴിഞ്ഞ കാലത്ത് പല വൈസ് ചാൻസലർ നിയമനങ്ങളും കോടതി കയറിയത് സർക്കാരിന്റെ നോമിനികളെ തിരുകി കയറ്റാൻ നടത്തിയ നിയമ വിരുദ്ധ ഇടപെടലുകൾ ആയിരുന്നുവെന്ന് ചാൻസലർ വിശ്വസിക്കുന്നു. അതുകൊണ്ട് ഇത്തവണ അത്തരം ഇടപെടലുകൾക്ക് വഴങ്ങേണ്ട എന്നാണ് ചാൻസലറുടെ തീരുമാനം. നിയമനങ്ങൾ തുടക്കം മുതൽ അസാധുവാണെന്ന് കോടതി കണ്ടെത്തിയപ്പോൾ അത് നിയമനധികാരിയായ ചാൻസലറുടെ പിടിപ്പ് കേടാണെന്നു വരുത്തിതീർക്കാനാണ് സർക്കാർ ശ്രമിച്ചത് എന്നതും ഗവർണറുടെ അപ്രീതിക്കു കാരണമായി.
നിയമന അധികാരി തന്നെയാണ് സെലെക്ഷൻ കമ്മിറ്റി രൂപീകരിക്കേണ്ടതെന്ന് പകൽ പോലെ വ്യക്തമാണെങ്കിലും പേരിനു ഒരു കമ്മിറ്റി രൂപീകരിച്ചതായി കാണിച്ചു കോടതി കയറി വിസി നിയമനങ്ങൾ അനന്തമായി നീട്ടിക്കൊണ്ട് പോവുക എന്നതാണ് സർക്കാരിന്റെ തന്ത്രം.   കേരള വിസി നിയമനത്തിൽ നിയമാനുസരണം സേർച്ച്‌ കമ്മിറ്റി രൂപീകരിക്കാൻ ഗവർണർക്ക് അനുമതി നൽകികൊണ്ടുള്ള ഹൈക്കോടതി ഉത്തരവ് നിലവിലുണ്ട്.