തിരുവനന്തപുരം: കോളേജ് ക്യാമ്പസിൽ നടക്കുന്ന ലഹരി ഉപയോഗവും അസാന്മാർഗിക പ്രവർത്തനങ്ങളും മാദ്ധ്യമങ്ങളോട് തുറന്നു പറഞ്ഞതിന് എസ്.എഫ്.ഐയുടെ അപ്രീതിക്ക് പാത്രമായ കാസർകോട് ഗവ. കോളേജ് പ്രിൻസിപ്പാളായിരുന്ന ഡോ. എം രമയെ എസ്.എഫ്.ഐയുടെ സമ്മർദ്ദത്തിന് വഴങ്ങി ദ്രോഹിച്ച സർക്കാരിന് ഹൈക്കോടതിയിൽ നിന്ന് കനത്ത തിരിച്ചടി.
ഡോ.രമയ്ക്കെതിരേ സർക്കാർ കൈകൊണ്ട എല്ലാ നടപടികളും ഹൈക്കോടതി ഡിവിഷൻ ബെഞ്ച് റദ്ദാക്കി. നിയമപരമായി സ്ത്രീധന വിരുദ്ധ സത്യവാങ്മൂലം കുട്ടികളിൽ നിന്ന് ഒപ്പിട്ടുവാങ്ങിയ ഗവ. കോളേജ് പ്രിൻസിപ്പൽ കുട്ടികളെ അപമാനിച്ചെന്ന വ്യാജ പരാതി നൽകിയാണ് എസ്.എഫ്.ഐ ദ്രോഹിച്ചത്. പരാതി കളവാണെന്ന് അറിയാമായിരുന്നിട്ടും ദ്രോഹത്തിന് സർക്കാർ കൂട്ടുനിന്നു. അതിനുള്ള തിരിച്ചടിയാണ് ഹൈക്കോടതി ഇന്ന് നൽകിയത്. ഈ വിഷയത്തിൽ അതിക്രൂരമായ സൈബർ അതിക്രമമാണ് ഡോ.രമയ്ക്ക് നേരിടേണ്ടി വന്നത്.
പതിറ്റാണ്ടുകളോളം നിസ്തുല സേവനം നടത്തിയ ഡോ.രമയുടെ പെൻഷൻ തടയുവാൻ ലക്ഷ്യമിട്ട് അവസാന പ്രവർത്തി ദിവസം സർക്കാർ നൽകിയ കുറ്റപത്രവും ഹൈക്കോടതി ഉത്തരവോടെ റദ്ദായി.
കാസർകോട് ഗവ. കോളേജിൽ എസ്എഫ്ഐ വിദ്യാർത്ഥികളുടെ നേതൃത്വത്തിൽ ലഹരി ഉപയോഗം വ്യാപകമാണെന്നും, അസാന്മാർഗിക പ്രവർത്തനം നടക്കുന്നെന്നും ഓൺലൈൻ മാധ്യമത്തോടാണ് ഡോ.രമ തുറന്നുപറഞ്ഞത്. എസ്എഫ്ഐയുടെ സമ്മർദ്ദത്തിന്റെ ഫലമായി അവരെ സ്ഥലം മാറ്റിയ ശേഷമായിരുന്നു നടപടികൾ. പെൻഷൻ തടയുവാനുള്ള നീക്കത്തിന്റെ ഭാഗമായി ഉന്നത വിദ്യാഭ്യാസ മന്ത്രിയുടെ പ്രേരണയിൽ എടുത്ത വകുപ്പുതല അന്വേഷണവും ഹൈക്കോടതി റദ്ദാക്കി. എങ്കിലും ഡോ.രമയ്ക്ക് സമാധാനത്തോടെ വിരമിക്കാനുള്ള അവസരം സർക്കാരിന്റെ ഇടപെടൽ കാരണം നിഷേധിക്കപ്പെട്ടു.
വകുപ്പുതല നടപടിയെടുക്കുവാൻ കോഴിക്കോട് കോളേജിയേറ്റ് എജുക്കേഷൻ ഡെപ്യൂട്ടി ഡയറക്ടർക്ക് അന്വേഷണ ചുമതല നൽകിയപ്പോൾ തന്നെ ഹൈക്കോടതി ഡിവിഷൻ ബെഞ്ച് നടപടി സ്റ്റേ ചെയ്തിരുന്നു. ഈ സാഹചര്യത്തിലാണ് രമയ്ക്കെതിരെ കെട്ടിച്ചമച്ചത് എന്ന് ആരോപിക്കപ്പെടുന്ന പഴയ ഒരു പരാതി പൊടിതട്ടിയെടുത്ത് വകുപ്പ് തല നടപടിയുടെ ഭാഗമായി ശരവേഗത്തിൽ വിരമിക്കുന്നതിന് മുന്നോടിയായുള്ള അവസാന പ്രവർത്തി ദിവസം കുറ്റപത്രം നൽകിയത്. അധ്യാപികയുടെ പെൻഷൻ തടയുക എന്നത് മാത്രമായിരുന്നു ലക്ഷ്യം.
2022 ൽ കാസർകോട് ഗവൺമെന്റ് കോളേജിൽ പ്രവേശനം നേടുവാൻ പരിശ്രമിച്ച ഒരു വിദ്യാർത്ഥിനി നൽകിയ പരാതിയുടെ അടിസ്ഥാനത്തിൽ ആയിരുന്നു അവസാന പ്രവർത്തി ദിവസം കുറ്റപത്രം നൽകിയത്. സ്ത്രീധന നിരോധന നിയമപ്രകാരവും, റാഗിംഗ് വിരുദ്ധ ചട്ടപ്രകാരവും രക്ഷിതാക്കൾ നൽകുന്ന സത്യവാങ്മൂലം പ്രവേശനത്തിന് മാനദണ്ഡമാണ് എന്ന് പ്രിൻസിപ്പാൾ കുട്ടിയെ അറിയിച്ചിരുന്നു. രക്ഷിതാവിനെ കൊണ്ടുവന്ന് അഡ്മിഷൻ എടുത്തുകൊള്ളാം എന്ന് തീരുമാനമെടുത്ത് വിദ്യാർത്ഥിനി പോവുകയായിരുന്നു.
ഈ കുട്ടി പിന്നീട് ബാഹ്യ സമ്മർദ്ദത്തിന്റെ ഫലമായി പ്രിൻസിപ്പാളിനെതിരെ പരാതി നൽകുകയായിരുന്നു. യുജിസി ഉത്തരവിന്റെ ഭാഗമായാണ് റാഗിംഗ് വിരുദ്ധ സത്യവാങ്മൂലത്തിൽ രക്ഷിതാവ് ഒപ്പിടേണ്ടത്. ചാൻസലറായ ഗവർണറുടെ ഉത്തരവ് പ്രകാരം രക്ഷിതാക്കൾ സ്ത്രീധന വിരുദ്ധ സത്യവാങ്മൂലത്തിൽ ഒപ്പിടണം. പരാതിക്കാരി പിന്നീട് ബ്രണ്ണൻ കോളേജിലേക്ക് മാറിയിരുന്നു. പരാതിയിൽ വർഷങ്ങളോളം നടപടിയൊന്നും കൈകൊണ്ടിരുന്നില്ല.
ഡോ.രമയ്ക്കെതിരേ എസ്എഫ്ഐയുടെ സമ്മർദ്ദത്തിലെടുത്ത നടപടികളിന്മേലുള്ള കേസ് പരാജയപ്പെടുന്നത് സർക്കാരിന് തിരിച്ചടിയാകും എന്നുറപ്പായതോടെ ഫെബ്രുവരി 15ന് കണ്ണൂർ സർവ്വകലാശാല രജിസ്ട്രാർ ശര വേഗത്തിൽ രമയ്ക്കെതിരെ റിപ്പോർട്ട് നൽകുകയായിരുന്നു.
സുപ്രീംകോടതി പുറത്താക്കിയ മുൻ വൈസ് ചാൻസലർ ഗോപിനാഥ് രവീന്ദ്രൻ പ്രത്യേക ഇടപെടലിലൂടെ പ്രൊഫസറായി നിയമിച്ച വ്യക്തിയാണ് രമക്കെതിരെ റിപ്പോർട്ട് സമർപ്പിച്ച രജിസ്ട്രാർ ജോബി കെ ജോസ് എന്ന് ആരോപണമുണ്ട്. എസ്എഫ്ഐയുടെ നിരന്തരമായ സമ്മർദ്ദ ഫലമായി ഡോ. രമക്കെതിരെ വകുപ്പുതല നടപടി എടുക്കുവാൻ ഉന്നത വിദ്യാഭ്യാസ മന്ത്രിയുടെ ഇടപെടലിന്റെ ഭാഗമായി ഉന്നത വിദ്യാഭ്യാസ വകുപ്പ് തയ്യാറാവുകയായിരുന്നു. ഡോ. രമ , സീനിയർ അഭിഭാഷകൻ ജോർജ് പൂന്തോട്ടം മുഖേനയാണ് ഹൈക്കോടതിയെ സമീപിച്ചത്.
ഹിയറിങ്ങിന് മുന്നോടിയായി ഡിവിഷൻ ബെഞ്ചിൽ നിന്നും സ്റ്റേ ലഭിച്ചു. പിന്നീടുള്ള ഹൈക്കോടതി സിറ്റിങ്ങിൽ രമ ഓൺലൈൻ മാധ്യമത്തിന് നൽകിയ അഭിമുഖം ഹൈക്കോടതി ഡിവിഷൻ ബഞ്ച് ഓപ്പൺ കോടതിയിൽ വീക്ഷിച്ചു. പ്രിൻസിപ്പാളിനെതിരെ പ്രത്യക്ഷത്തിൽ തെളിവുകളൊന്നുമില്ല എന്നും, എസ്എഫ്ഐയുടെ ഇടപെടൽ വ്യക്തമാണ് എന്നും കോടതി നിരീക്ഷിച്ചു.
വിധി രമയ്ക്ക് അനുകൂലമാകും എന്ന സൂചനയുടെ അടിസ്ഥാനത്തിലാണ് കണ്ണൂർ സർവ്വകലാശാല രജിസ്ട്രാർ നൽകിയ തട്ടിക്കൂട്ട് റിപ്പോർട്ടിന്റെ അടിസ്ഥാനത്തിൽ അവസാന പ്രവർത്തി ദിവസത്തിൽ രമക്കെതിരെ കുറ്റപത്രം സമർപ്പിച്ചത്. ഹൈക്കോടതി ജഡ്ജിമാരായ മുഹമ്മദ് മുഷ്താഖ്, ശോഭാ അന്നമ്മ ഈപ്പൻ എന്നിവർ ഉൾപ്പെട്ട ഡിവിഷന്റേതാണ് ഉത്തരവ്.
സാങ്കേതിക യൂണിവേഴ്സിറ്റി വിസിയായിരുന്ന ഡോ: സിസ തോമസിനെതിരെ സർക്കാർ കൈക്കൊണ്ട ശിക്ഷ നടപടികൾ ഹൈക്കോടതി ഡിവിഷൻ ബെഞ്ച് റദ്ദാക്കിയതിനു പിന്നാലെയുള്ള അടുത്ത തിരിച്ചടിയാണ് ഇന്ന് കാസർഗോഡ് ഗവകോളേജ് പ്രിൻസിപ്പൽ ഡോ: രമ യ്ക്കെതിരായുള്ള നടപടികൾ റദ്ദാക്കിയതിലൂടെ സർക്കാരിന് കിട്ടിയത്.
സർക്കാരിന് അനുകൂലമായ അഡ്മിനിസ്ട്രേറ്റീവ് ട്രിബൂനൽ ഉത്തരവുകൾ ഹൈക്കോടതി ഡിവിഷൻ ബെഞ്ച് റദ്ദാക്കുന്നത് ഒരു തുടർക്കഥയാവുകയാണ്. ഡോ. സിസാ തോമസിനെതിരെയുള്ള ഉത്തരവ്, ഗവ: കോളേജ് പ്രിൻസിപ്പൽമാരുടെ നിയമനം സംബന്ധിച്ച ഉത്തരവ്, ഡയറ്റ് ലക്ചറർ നിയമനങ്ങൾ പി.എസ്.സിക്ക് റിപ്പോർട്ട് ചെയ്യുന്നത് തടഞ്ഞ ഉത്തരവുകൾ എല്ലാം ഹൈക്കോടതി റദ്ദാക്കുകയായിരുന്നു