ആലുവ: കെ.എസ്.ആര്‍.ടി.സി. ബസ് സ്റ്റാന്‍ഡ് പരിസരത്ത് 15 പേരെ കടിച്ച നായയ്ക്ക് പേവിഷബാധ സ്ഥിരീകരിച്ചു. നഗരസഭ പിടികൂടിയ നായ കഴിഞ്ഞ ദിവസം ചത്തിരുന്നു. തുടര്‍ന്ന് നടത്തിയ പോസ്റ്റുമോര്‍ട്ടത്തിലാണ് പേവിഷബാധ കണ്ടെത്തിയത്.
കഴിഞ്ഞ ദിവസം വെറ്ററിനറി സര്‍ജന്‍ നടത്തിയ പരിശോധനയില്‍ പേവിഷ ബാധയുടെ ലക്ഷണമുള്ളതായി കണ്ടെത്തിയിരുന്നില്ല. പേവിഷ ബാധ സ്ഥിരീകരിച്ച സാഹചര്യത്തില്‍ നായുടെ കടിയേറ്റ എല്ലാവരും ആന്റി റാബിസ് വാക്‌സിന്‍ തുടര്‍ ഡോസുകള്‍ മുടക്കം കൂടാതെ സ്വീകരിക്കണമെന്ന് നഗരസഭാ ആരോഗ്യ വിഭാഗം അധികൃതര്‍ അറിയിച്ചു.
എല്ലാവര്‍ക്കും ഒന്നാം ഡോസ് നല്‍കിയിരുന്നു. അടിയന്തര സാഹചര്യം നേരിടുന്നതിന് നഗരസഭ ചെയര്‍മാന്റെ നേതൃത്വത്തില്‍ ബന്ധപ്പെട്ട ഉദ്യോഗസ്ഥരുടെ യോഗം വെള്ളിയാഴ്ച രാവിലെ 11ന്് ചേരും.
നഗരസഭ പ്രദേശത്ത് അലഞ്ഞുതിരിഞ്ഞ് നടക്കുന്ന നായ്ക്കളെ കണ്ടെത്തി പേവിഷത്തിനെതിരായ കുത്തിവെപ്പ് നടത്തുമെന്ന് ചെയര്‍മാന്‍ അറിയിച്ചു. നഗരസഭാ പ്രദേശത്തെ വളര്‍ത്തുനായ്ക്കള്‍ക്കും കുത്തിവെപ്പ് നല്‍കിയിട്ടുണ്ടെന്ന് ഓരോ ഉടമകളും ഉറപ്പുവരുത്തണമെന്നും അധികൃതര്‍ അറിയിച്ചു.
