പെസഹാ ദിനത്തിൽ വിശ്വാസികൾക്ക് ഇരുട്ടടി നൽകി കെഎസ്ഇബി പാലാ ഡിവിഷൻ. പല സ്ഥലങ്ങളിലും വൈദ്യുതി മുടങ്ങിയത് 6 മുതൽ 16 മണിക്കൂർ വരെ

പാലാ: ഡിവിഷന് കീഴിൽ വരുന്ന പാലാ, ഭരണങ്ങാനം, പൈക, രാമപുരം സെക്ഷനുകളിലെ പതിനായിരക്കണക്കിന്  ഉപഭോക്താക്കളാണ്  പെസഹാ ദിനത്തിലെ അപ്രതീക്ഷിത വൈദ്യുതി മുടക്കം മൂലം വലഞ്ഞത്. വൈകുന്നേരത്തോടെ വൈദ്യുതി മുടങ്ങിയതോടെ ക്രൈസ്തവ വിശ്വാസികളായ ഉപഭോക്താക്കൾ മെഴുകുതിരി വെളിച്ചത്തിൽ പെസഹ അപ്പം  മുറിക്കേണ്ട വന്നു.
വ്യാഴാഴ്ച വൈകുന്നേരം ആറരയോട് കൂടി മുടങ്ങിയ വൈദ്യുതി വിതരണം ആറു മുതൽ 16 മണിക്കൂറിന് ശേഷമാണ് പല സെക്ഷനുകളിലും പുനസ്ഥാപിക്കാൻ കഴിഞ്ഞത്. മഴ മൂലമാണ് വൈദ്യുതി മുടങ്ങിയത് എന്നാണ് കെഎസ്ഇബി അധികൃതർ നൽകുന്ന വിശദീകരണം. ശക്തമായ കാറ്റോ മരം വീഴ്ചയോ ഒന്നും ഇല്ലായിരുന്നു എന്നതാണ് ശ്രദ്ധേയം. എന്നാൽ ഇത്തരം സംഭവങ്ങൾ യാദൃശ്ചികം അല്ലെന്നും പാലാ ഡിവിഷനിൽ സ്ഥിരമായി ഉണ്ടാകാറുള്ളതാണെന്നും ഉപഭോക്താക്കൾ ആരോപിക്കുന്നു.
പാലാ, ഭരണങ്ങാനം, പൈക സെക്ഷനുകളിൽ ഉണ്ടായിക്കൊണ്ടിരുന്ന നിരന്തരമായ ഇത്തരം വൈദ്യുതി മുടക്കങ്ങൾ ഉന്നത അധികാരികളുടെ ശ്രദ്ധയിൽപ്പെടുത്തിയിട്ടും ശാശ്വത പരിഹാരം കാണുന്നില്ല എന്നും പ്രദേശവാസികൾ ആരോപിക്കുന്നു. ഇടമറ്റത്തു വോൾട്ടേജ് എന്നത് നാമമാത്രമാണ്.
പാലാ ഡിവിഷന് കീഴിലെ വിതരണ ശൃംഖലയിൽ കേന്ദ്രസർക്കാരിൻറെ ഇന്റർ ഗ്രേറ്റർ പവർ ഡെവലപ്മെൻറ് (integrated power development) സിസ്റ്റം വഴി നടപ്പിലാക്കിയ പല പദ്ധതികളും അഴിമതിയും വസ്തുക്കളുടെ ഗുണമില്ലായ്മയും മൂലം ഉപഭോക്താക്കൾക്ക് വേണ്ടത്ര പ്രയോജനം ലഭിക്കുന്നില്ല. ഇത്തരം വർക്കുകളുടെ ഫണ്ട് വിനിയോഗം ഉൾപ്പെടെയുള്ള കാര്യങ്ങളിൽ വിജിലൻസ് പരിശോധന നടത്തണമെന്നും വർക്കുകളുടെ ഫണ്ട് വിനിയോഗം കേന്ദ്ര ഊർജ്ജമന്ത്രാലയം പരിശോധിക്കണമെന്നും ആവശ്യപ്പെട്ടുകൊണ്ട് കേന്ദ്ര ഊർജ്ജമന്ത്രാലയത്തിനും വിജിലൻസിനും പരാതി നൽകാൻ ഒരുങ്ങുകയാണ് പാല നിവാസികളും വിവിധ സംഘടനകളും.
പാലാ സെക്ഷന് കീഴിൽ പാലാ നഗരത്തിലെയും ചുറ്റുമുള്ള പ്രദേശങ്ങളിലെയും വൈദ്യുതി മുടക്കത്തിന് ശാശ്വത പരിഹാരം കാണുന്നതിനായി ഭൂഗർഭ 11 കെവി വിതരണ ശൃംഖല തയ്യാറാക്കിയെങ്കിലും അതിൽ ഉപയോഗിച്ച വസ്തുക്കളുടെ നിലവാരമില്ലായ്മ മൂലം വൈദ്യുതി മുടക്കം നിത്യ സംഭവമാണ്.
പാലാ ഡിവിഷന് കീഴിൽ വരുന്ന ഭരണങ്ങാനം, പൈക സെക്ഷനുകളിൽ വേണ്ടത്ര 11 കെവി ഫീഡർ സംവിധാനം നിലവിൽ ഇല്ലാത്തതിനാൽ വൈദ്യുതി  മുടക്കവും വോൾട്ടേജ് വ്യതിയാനവും നിത്യ സംഭവമാണ്. പെസഹാ ദിനത്തിൽ ഭരണങ്ങാനം സെഷനിൽ ആകെയുള്ള 89 ട്രാൻസ്ഫോമറുകളും ഓഫ് ആയി കിടക്കുന്ന സാഹചര്യമാണ് ഉണ്ടായത്.
ഭരണങ്ങാനം സെക്ഷൻ പരിധിയിലെ ഫീഡറുകളും വിതരണ ശൃംഖലയും പുനർ ക്രമീകരണം നടത്തി ഭരണങ്ങാനം, പൈക സെക്ഷൻ പരിധിയിൽ വരുന്ന പ്രദേശങ്ങളിൽ വൈദ്യുതി തടസ്സം പരിഹരിക്കണമെന്ന നാട്ടുകാരുടെ ആവശ്യത്തിന് വർഷങ്ങളുടെ പഴക്കമുണ്ട്.
പാലാ ഡിവിഷന് കീഴിലെ പൈക സെക്ഷനിലും സ്ഥിതി വിഭിന്നമല്ല. മിക്കവാറും ദിവസങ്ങളിലും മണിക്കൂറുകൾ വൈദ്യുതി മുടങ്ങിക്കിടക്കുന്നു. പൈക, രാമപുരം സെക്ഷനുകളിൽ വൈദ്യുതി മുടങ്ങിയാൽ പലപ്പോഴും ഉപഭോക്താക്കൾ ലാൻഡ് ഫോണിൽ  ബന്ധപ്പെടാൻ ശ്രമിച്ചാൽ  കിട്ടാറില്ല എന്നും സിയുജി നമ്പർ ഓഫാക്കി ഇടുന്നതായും ഉപഭോക്താക്കൾ ആരോപിക്കുന്നു.
അഥവാ ഫോൺ എടുത്താൽ “കരണ്ട് പോയാൽ വരും, താമസിക്കും, രാവിലെയാകും..” എന്നിങ്ങനെ പല വിധത്തിൽ ധാർഷ്ട്യമായി പെരുമാറുന്നു എന്നും ഉപഭോക്താക്കൾ ആരോപിക്കുന്നു. രാവിലെയേ വരൂ എന്ന് പറഞ്ഞാൽ ചിലപ്പോൾ മിനിറ്റുകൾക്കുള്ളിൽ വൈദ്യുതി എത്തുകയും ചെയ്യും. പരാതികളിൽ കൃത്യമായ ധാരണ ഇല്ലാതെ വിളിക്കുന്നവരോടു ഇങ്ങനെ വായിൽ തോന്നുന്നത് പറയുന്നതാണ് പതിവ്.
പെസഹാ ദിനത്തിൽ പാലാ, രാമപുരം,  ഭരണങ്ങാനം,  പൈക സെക്ഷനുകളിൽ ഉണ്ടായ ദീർഘമായ വൈദ്യുതി മുടക്കത്തിന്റെ കാരണം അന്വേഷിക്കണം എന്ന് ആവശ്യപ്പെട്ട് വൈദ്യുത വകുപ്പ് മന്ത്രിക്കും വൈദ്യുതി വകുപ്പ് ചെയർമാനും പരാതി നൽകുവാൻ ഒരുങ്ങുകയാണ് പ്രദേശവാസികൾ.
പാലാ, ഭരണങ്ങാനം,  പൈക സെക്ഷനുകളിൽ സ്ഥിരമായി ഉണ്ടാകാറുള്ള വൈദ്യുതി മുടക്കങ്ങളിൽ  താൽക്കാലികമായി എങ്ങനെയെങ്കിലും വൈദ്യുതി എത്തിച്ച് നൽകുകയല്ലാതെ ഇത്തരം വൈദ്യുതി മുടക്കങ്ങൾ ആവർത്തിക്കപ്പെടാതിരിക്കുവാൻ സബ് ഡിവിഷൻ അധികാരികൾ തയ്യാറാകുന്നില്ല എന്നും ഉപഭോക്താക്കൾ  ആരോപിക്കുന്നു. മാത്രമല്ല  സെക്ഷനുകളെ സബ് ഡിവിഷനിൽ ഉൾപ്പെടുത്തിയിരിക്കുന്നതിലെ അപാകതകളും പരിഹരിക്കണമെന്നും ഉപഭോക്താക്കൾ ആവശ്യപ്പെടുന്നു.