കൊച്ചി: കോളജില്‍ വച്ച് പാട്ടുപാടുന്നതിനിടെ ജാസി ഗിഫ്റ്റിന്റെ കയ്യില്‍ നിന്നും പ്രിന്‍സിപ്പാള്‍ മൈക്ക് പിടിച്ചുവാങ്ങി. കോലഞ്ചേരി സെന്റ് പീറ്റേഴ്‌സ് കോളജില്‍ വച്ചായിരുന്നു സംഭവം. അപ്രതീക്ഷിതമായ പ്രിന്‍സിപ്പലിന്റെ നടപടിയില്‍ പ്രതിഷേധിച്ച് ജാസി ഗിഫ്റ്റ് വേദി വിട്ടിറങ്ങിപ്പോയി. പ്രിന്‍സിപ്പലിന്റെ നടപടി വേദനിപ്പിച്ചെന്ന് ഗായകനും സംഗീത സംവിധായകനുമായ ജാസി ഗിഫ്റ്റ് പറഞ്ഞു.
ഒരു കലാകാരനെയും ഇങ്ങനെ അപമാനിക്കരുതെന്ന് ജാസി ഗിഫ്റ്റ് പ്രതികരിച്ചു. പാട്ടുകാരനൊപ്പം കോറസ് പാടാന്‍ ആളുകളെത്തുന്നത് സാധാരണമാണ്. എന്നാല്‍, ഇക്കാര്യമൊന്നും നോക്കാതെ പ്രിന്‍സിപ്പല്‍ തന്റെ കൈയ്യില്‍ നിന്നും മൈക്ക് പിടിച്ചുവാങ്ങുകയായിരുന്നു. കൂടെ പാടാന്‍ വന്നയാളെ ഒഴിവാക്കണമെന്നും ആവശ്യപ്പെട്ടു. കാലാകാരനെന്ന നിലയില്‍ ഇത് അപമാനിക്കലാണെന്നും ജാസി ഗിഫ്റ്റ് പറഞ്ഞു.
എന്നാല്‍, തന്റെ നടപടിയെ കോളേജ് പ്രിന്‍സിപ്പല്‍ ന്യായീകരിക്കുകയാണ്. പുറത്ത് നിന്നുള്ള ആളുകളുടെ സംഗീത നിശ കോളേജിനകത്ത് നടത്തുന്നതിന് നിയന്ത്രണങ്ങളുണ്ടെന്നും ഇക്കാര്യം മൈക്ക് വാങ്ങി പറയുക മാത്രമാണ് ചെയ്തതെന്നാണ് കോലഞ്ചേരി സെന്റ് പീറ്റേഴ്‌സ് കോളേജ് പ്രിന്‍സിപ്പല്‍ പറയുന്നത്.
കോലഞ്ചേരി സെന്റ് പീറ്റേഴ്‌സ് കോളേജില്‍ കോളേജ് ഡേ പരിപാടിയിലെ മുഖ്യാതിഥിയായിരുന്നു ജാസി ഗിഫ്റ്റ്. പാടുന്നതിനിടെ ഉദ്ഘാടകനായ ജാസി ഗിഫ്റ്റിന് മാത്രം പാടാനാണ് അനുമതി നല്‍കിയിരുന്നതെന്ന നിലപാടെടുത്ത പ്രിന്‍സിപ്പല്‍ മൈക്ക് പിടിച്ച് വാങ്ങുകയായിരുന്നു.
കോലഞ്ചേരി സെന്റ് പീറ്റേഴ്‌സ് കോളേജില്‍ പരിപാടിക്കിടെ ജാസി ഗിഫ്റ്റിന്റെ കൈയ്യില്‍ നിന്നും പ്രിന്‍സിപ്പല്‍ മൈക്ക് പിടിച്ചുവാങ്ങി; പ്രതിഷേധിച്ച് ഗായകന്‍
Byadmin
Mar 15, 2024