തിരുവനന്തപുരം: സര്‍വീസ് ചെയ്തശേഷം വീട്ടിലെത്തിച്ച ഇലക്ട്രിക് സ്‌കൂട്ടര്‍ പൊട്ടിത്തെറിയോട കത്തിനശിച്ചു. കഴിവൂര്‍ വേങ്ങപ്പൊറ്റ മഞ്ചാംകുഴി വി.എസ് സദനത്തില്‍ അമല്‍ വിന്‍സിന്റെ ഒന്നര ലക്ഷത്തോളം വില വരുന്ന ഇലക്ട്രിക് സ്‌കൂട്ടറാണ് കത്തി നശിച്ചത്.
രാവിലെ വെളളറ ചെമ്പൂരുളള സര്‍വീസ് സെന്ററില്‍ സ്‌കൂട്ടറിന്റെ അറ്റകുറ്റപ്പണി നടത്തിയിരുന്നു. തുടര്‍ന്ന് ഓടിച്ചെത്തിയശേഷം അപ്പൂപ്പന്‍ സെല്‍വനോസിന്റെ വീട്ടുവളപ്പിലാണ് പാര്‍ക്കുചെയ്തിരുന്നത്. പത്തു മിനിറ്റിന് ശേഷം സ്‌കൂട്ടര്‍ പൊട്ടിത്തെറിയോടെ കത്തി നശിക്കുകയായിരുന്നു എന്ന് അമല്‍ വിന്‍സ് പറഞ്ഞു.
സ്‌കൂട്ടറില്‍ നിന്നുളള തീ പടര്‍ന്ന് പാര്‍ക്ക് ചെയ്തിരുന്ന ഭാഗത്തെ ജനാലയുടെ കണ്ണാടി ചില്ലുകള്‍ പൊട്ടിത്തെറിച്ച് ചുമരും തകര്‍ന്നു. ചുമരിന്റെ ഒരുഭാഗം ചൂടുംപുകയുമേറ്റ് കരിയുകയും ചെയ്തിട്ടുണ്ട്. ആസ്ബെസ്റ്റോസ് ഷീറ്റുകള്‍ മേഞ്ഞിരുന്ന സമീപത്തെ ഷെഡും കത്തിനശിച്ചു.
വീട്ടുകാര്‍ ഇറങ്ങിയോടി. നാട്ടുകാരെത്തി വിഴിഞ്ഞം അഗ്‌നിരക്ഷാസേനയെ വിവരമറിയിച്ചു. പൊലീസും വിഴിഞ്ഞം അഗ്‌നിരക്ഷാസേനയും സ്ഥലത്ത് എത്തിയപ്പോഴേക്കും സ്‌കൂട്ടര്‍ പൂര്‍ണ്ണമായും കത്തി നശിച്ചിരുന്നു. ഒന്നര വര്‍ഷം മുമ്പ് വാങ്ങിയ സ്‌കൂട്ടറാണ് കത്തിയമർന്നത്. ഏകദേശം നാലുലക്ഷത്തോളം രൂപയുടെ നഷ്ടമുണ്ടായതായി വിഴിഞ്ഞം അഗ്‌നിരക്ഷാസേനാധികൃതര്‍ പറഞ്ഞു.
തിരുവനന്തപുരത്ത് സര്‍വീസ് കഴിഞ്ഞ് വീട്ടിലെത്തിച്ച ഇലക്ട്രിക് സ്‌കൂട്ടര്‍ കത്തിനശിച്ചു; വീടിന് കേടുപാട്
Byadmin
Mar 9, 2024