തിരുവനന്തപുരം: ഉക്രെയിനുമായുള്ള യുദ്ധത്തിൽ റഷ്യൻ പടയാളികൾ മരിച്ചു വീഴുമ്പോൾ ഇന്ത്യയിൽ നിന്നടക്കം യുവാക്കളെ റിക്രൂട്ട് ചെയ്ത് യുദ്ധമുഖത്ത് അണിനിരത്തുന്നു. തിരുവനന്തപുരത്തെ ഏജൻസി ഇങ്ങനെ വമ്പൻ റിക്രൂട്ട്മെന്റാണ് നടത്തിയിരിക്കുന്നത്. റഷ്യയുടെ സ്വകാര്യ സുരക്ഷാ ഗ്രൂപ്പായ വാഗ്നർ ഗ്രൂപ്പിനാണ് മലയാളികളെയടക്കം കൈമാറുന്നത്. രണ്ട് ഇന്ത്യക്കാർ യുദ്ധത്തിൽ കൊല്ലപ്പെട്ടതോടെ അതീവ ജാഗ്രതയിലാണ് ഇന്ത്യ.
3 ലക്ഷം രൂപ വിസയ്ക്കെന്ന പേരിൽ ഈടാക്കി വൻതോതിൽ റിക്രൂട്ട്മെന്റ് നടത്തിയിട്ടുണ്ടെന്ന് സി.ബി.ഐ കണ്ടെത്തി. റഷ്യയിൽ ഓഫീസ് ജോലിയടക്കം വാഗ്ദാനം ചെയ്തായിരുന്നു റിക്രൂട്ട്മെന്റ്.
കേരളം, തമിഴ്നാട്, കർണാടക, പഞ്ചാബ്, ഹരിയാന അടക്കം സംസ്ഥാനങ്ങളിൽ നിന്നായി 180ലേറെപ്പേരെ ഇതിനകം റിക്രൂട്ട് ചെയ്തതായി സംശയിക്കുന്നു. സോഷ്യൽ മീഡിയ വഴി വമ്പൻ ജോലിയും ശമ്പളവും വാഗ്ദാനം ചെയ്തുള്ള റിക്രൂട്ട്മെന്റ് വെറും തട്ടിപ്പാണെന്നാണ് കേന്ദ്ര സർക്കാരിന്റെ മുന്നറിയിപ്പ്.
റഷ്യയിലേക്ക് മലയാളികളെയടക്കം റിക്രൂട്ട് ചെയ്ത 3 മലയാളികളടക്കം 19 പേർക്കെതിരേ കേസെടുത്തിരിക്കുകയാണ് സി.ബി.ഐ. തിരുവനന്തപുരം തുമ്പ ഫാത്തിമ ആശുപത്രിക്കടുത്ത് ടീന കോട്ടേജിൽ ഡോമിരാജ്, കഠിനംകുളം തൈവിളാകം തെരുവിൽ റോബർട്ട് അരുളപ്പൻ, തിരുവനന്തപുരം പുത്തൻകുറിച്ചി തൈവിളാകം തെരുവിൽ സജിൻ ഡിക്സൺ എന്നിവരെയാണ് പ്രതികളാക്കിയത്.
ഇവർക്കെതിരേ ക്രിമിനൽ ഗൂഢാലോചന, വഞ്ചന, മനുഷ്യക്കടത്ത് കുറ്റങ്ങൾക്ക് ഐ.പി.സി 120(ബി), 420, 370 വകുപ്പുകൾ ചുമത്തി. ഏജൻസി വഴി കടത്തിയവരെ തിരിച്ചെത്തിക്കാൻ കേന്ദ്രസർക്കാർ ശ്രമം തുടങ്ങി.
സമൂഹമാദ്ധ്യമങ്ങളിലൂടെ റഷ്യൻ സർക്കാരിൽ ഓഫീസ് ജോലി, ഹെൽപ്പർ, സെക്യൂരിറ്റി ഓഫീസർ ജോലികൾ വാഗ്ദാനം ചെയ്താണ് മോസ്കോയിലേക്ക് ഇവരെ റിക്രൂട്ട് ചെയ്തത്. ഒരു വർഷം കഴിഞ്ഞാൽ റഷ്യൻ പൗരത്വം ഉറപ്പുനൽകി. 1.95 ലക്ഷം പ്രതിമാസ ശമ്പളവും 50,000 രൂപ അലവൻസുകളുമായിരുന്നു വാഗ്ദാനം.
മെഡിക്കൽ പരിശോധനയ്ക്ക് ശേഷമായിരുന്നു റിക്രൂട്ട്മെന്റ്. ഇവരുടെ കുടുബ, സാമൂഹ്യ പശ്ചാത്തലം പരിശോധിച്ച് ചാരന്മാരല്ലെന്ന് ഉറപ്പാക്കി. പണംനൽകി 5 ദിവസംകൊണ്ട് വിസ നൽകും. ഒരു വർഷത്തെ കരാറിലാണ് കൊണ്ടുപോയത്. ഒരു വർഷം കഴിയാതെ അവധിയില്ലെന്നും ഇവരെ ധരിപ്പിച്ചു.
ഡൽഹിയിൽ നിന്ന് മോസ്കോയിലേക്കും ഷാർജ വഴിയുമാണ് ഇവരെ കൊണ്ടുപോയത്. റഷ്യയിലെത്തിയ ഉടൻ ഇവരുടെ പാസ്പോർട്ട് ഏജന്റുമാർ പിടിച്ചെടുത്തു. ആയുധപരിശീലനം നൽകിയശേഷം റഷ്യൻ പട്ടാളത്തിന്റെ യൂണിഫോം ധരിപ്പിച്ച് യുക്രെയിനുമായുള്ള യുദ്ധമുഖത്തെത്തിച്ചു.
യുദ്ധമുഖത്ത് മിസൈലാക്രമണത്തിൽ 2 ഇന്ത്യക്കാർ കൊല്ലപ്പെട്ടിട്ടുണ്ട്. നിരവധി പേർക്ക് ഗുരുതരമായി പരിക്കേറ്റു. യുദ്ധമുഖത്തുള്ള 35 പേരെ തിരിച്ചറിഞ്ഞിട്ടുണ്ട്. ശേഷിക്കുന്നവർ ആയുധപരിശീലനം നേടുകയാണ്. ഇന്റർപോളുമായി ചേർന്ന് ഇന്ത്യക്കാരെ തിരിച്ചെത്തിക്കാൻ സി.ബി.ഐ ശ്രമിക്കുന്നുണ്ട്.
പാകിസ്ഥാൻ, ബംഗ്ലാദേശ്, നേപ്പാൾ, ഉസ്ബക്കിസ്ഥാൻ, കസാക്കിസ്ഥാൻ പൗരന്മാരെയും റിക്രൂട്ട് ചെയ്തിട്ടുണ്ട്. 2022 ഫെബ്രുവരി 24ന് തുടങ്ങിയ റഷ്യ-ഉക്രെയിൻ യുദ്ധത്തിൽ ഇരുപക്ഷത്തും വൻ ആൾനാശമുണ്ടായതിനെത്തുടർന്നാണ് റഷ്യ യുദ്ധത്തിന് യുവാക്കളെ വാടകയ്ക്കെടുക്കുന്നത്.
റഷ്യയിലേക്കുള്ള റിക്രൂട്ട്മെന്റ് മനുഷ്യക്കടത്തായാണ് സി.ബി.ഐ പരിഗണിക്കുന്നത്. അതിനാൽ കടുത്ത ശിക്ഷ ഉറപ്പാക്കാനാണ് ശ്രമം. പ്രതികളിൽ മിക്കവരും സി.ബി.ഐയുടെ കസ്റ്റഡിയിലാണെന്നാണ് സൂചന.