തിരുവനന്തപുരം: കെ സുധാകരന്‍ കണ്ണൂരില്‍ സ്ഥാനാര്‍ത്ഥിയാകുന്ന സാഹചര്യത്തില്‍ കെപിസിസി പ്രസിഡന്റിന്റെ ചുമതല ടി സിദ്ധിഖിന് നല്‍കിയേക്കുമെന്ന് സൂചന.
നിലവില്‍ കെപിസിസിയുടെ രണ്ട് വര്‍ക്കിംഗ് പ്രസിഡന്റുമാരില്‍ ഒരാളാണ് ടി സിദ്ധിഖ്. മറ്റൊരു വര്‍ക്കിംഗ് പ്രസിഡന്റായ കൊടിക്കുന്നില്‍ സുരേഷ് മാവേലിക്കരയില്‍ സ്ഥാനാര്‍ത്ഥിയാണ്. ഈ സാഹചര്യത്തില്‍ മത്സരരംഗത്തില്ലാത്ത വര്‍ക്കിംഗ് പ്രസിഡന്റ് എന്ന നിലയില്‍ സിദ്ദിഖിന് ചുമതല നല്‍കുകയെന്നത് സ്വാഭാവിക നടപടിയാണ്.
മാത്രമല്ല കോണ്‍ഗ്രസിന്റെ 16 അംഗ സ്ഥാനാര്‍ത്ഥി പട്ടികയില്‍ മുസ്ലിം പ്രാതിനിധ്യം ഉള്ളത് വടകരയില്‍ സ്ഥാനാര്‍ത്ഥിയാകുമെന്ന് പ്രതീക്ഷിക്കുന്ന ഷാഫി പറമ്പില്‍ മാത്രമാണ്. സിദ്ധിഖിന് ചുമതല നല്‍കുന്നതോടു കൂടി ആ പ്രാതിനിധ്യ കുറവിനും പരിഹാരമാകും.
കെ സുധാകരന്‍ തന്നെ കണ്ണൂരില്‍ മത്സരിക്കണമെന്നാണ് എഐസിസിയുടെ തീരുമാനം. വൈകിട്ട് നാലേ മുക്കാലിന്റെ വിമാനത്തില്‍ കേരളത്തില്‍ നിന്നുള്ള നേതാക്കള്‍ മടങ്ങുമെന്നിരിക്കെ പ്രഖ്യാപനം വൈകാതെ ഉണ്ടാകുമെന്നാണ് പ്രതീക്ഷിക്കുന്നത്.
സുധാകരന്‍ മത്സരത്തിനിറങ്ങുമ്പോള്‍ പകരം ടി സിദ്ദിഖിന് കെപിസിസി പ്രസിഡന്റിന്റെ ചുമതല നല്‍കിയേക്കും
Byadmin
Mar 8, 2024