കൊച്ചി: തൈക്കുടത്ത് മകള്‍ വീട്ടില്‍ കയറ്റുന്നില്ലെന്ന പരാതിയുമായി വയോധിക. തൈക്കൂടം സ്വദേശി സരോജിനി(78)യാണ് ദിവസങ്ങളോളം വീടിന് പുറത്ത് കാത്തുനിന്നത്. ഒടുവില്‍ നാട്ടുകാരുടെ സഹായത്തോടെ സരോജിനി വാതില്‍ പൊളിച്ചു അകത്തുകയറി. വീട്ടില്‍ കയറ്റാന്‍ ആര്‍.ഡി.ഒയുടെ ഉത്തരവുണ്ടായിട്ടും പോലീസ് ഇടപെട്ടില്ലെന്നാണ് ആരോപണം.
തൈക്കുടത്തെ എ.കെ.ജി. റോഡിലെ സ്വന്തം വീട്ടില്‍ മൂത്ത മകള്‍ക്കൊപ്പമായിരുന്നു സരോജിനിയുടെ താമസം. മൂകാംബികയില്‍ പോവുകയാണെന്നും ഇളയമകള്‍ക്കൊപ്പം നില്‍ക്കണമെന്ന് അറിയിച്ചു മൂത്ത മകളും കുടുംബവും വീടുപൂട്ടി പോയി. ഇളയമകള്‍ക്കൊപ്പം താമസിച്ച സരോജിനി എട്ട് ദിവസം മുമ്പാണ് മടങ്ങിയെത്തിയത്. വീട് പൂട്ടിക്കിടന്നിരുന്നതിനാല്‍ അയല്‍വീടുകളില്‍ മാറിമാറി താമസിച്ചു വരികയായിരുന്നു.
ഇതിനിടെ വീട്ടില്‍ കയറ്റണമെന്ന് അറിയിച്ച് ആര്‍.ഡി.ഒ. ഉത്തരവിറക്കിയിട്ടും നടപടിയുണ്ടായില്ല. ഒടുവില്‍ മണിക്കൂറുകള്‍ വീടിന് പുറത്ത് കാത്തിരുന്നശേഷം സരോജിനി കമ്പിപ്പാരകൊണ്ട് വാതില്‍ പൊളിച്ച് വീടിനടത്ത് കയറുകയായിരുന്നു. വിവരമറിഞ്ഞ എം.എല്‍.എ. ഉമ തോമസും പോലീസും എത്തി നടപടികള്‍ സ്വീകരിച്ചു.
വീടുംപൂട്ടി മകള്‍ പോയി, ദിവസങ്ങളോളം വീടിന് പുറത്ത്; ഒടുവില്‍ പൂട്ടുപൊളിച്ച് വീടിനകത്ത് കയറി വയോധിക
Byadmin
Mar 2, 2024