തെലങ്കാനയിലും മറ്റ് ദക്ഷിണേന്ത്യൻ സംസ്ഥാനങ്ങളിലും പിടിമുറുക്കാൻ ശ്രമിക്കുന്നതിനിടെ ബിജെപിക്ക് വീണ്ടും നേട്ടം; ബിആർഎസ് എംപി ബിബി പാട്ടീൽ ബിജെപിയിൽ ചേർന്നു

തെലങ്കാന: ലോക്‌സഭാ തിരഞ്ഞെടുപ്പിന് മുന്നോടിയായി ഭാരത് രാഷ്ട്ര സമിതി എംപി ബിബി പാട്ടീൽ ബിജെപിയിൽ ചേർന്നു. പാട്ടീലിനെ സാഹിറാബാദിൽ നിന്നും മത്സരിപ്പിക്കുമെന്നാണ് പ്രതീക്ഷ.
നാഗർകുർണൂൽ പാർലമെൻ്റ് മണ്ഡലത്തിൽ നിന്നുള്ള ബിആർഎസ് എംപിയായ പോത്തുഗണ്ടി രാമുലുവും മകൻ ഭരത് പ്രസാദും മറ്റ് ചില ബിആർഎസ് നേതാക്കളും ബിജെപിയിൽ ചേർന്നതിന് തൊട്ടു പിന്നാലെയാണ് സംഭവവികാസം. 
കേന്ദ്രമന്ത്രി രാജീവ് ചന്ദ്രശേഖർ, പാർട്ടിയുടെ തെലങ്കാന ചുമതലയുള്ള തരുൺ ചുഗ്, ഒബിസി മോർച്ച മേധാവി കെ ലക്ഷ്മൺ എന്നിവരുടെ സാന്നിധ്യത്തിലാണ് പാട്ടീൽ ബിജെപിയിൽ ചേർന്നത്. പിന്നാലെ പ്രധാനമന്ത്രി നരേന്ദ്ര മോദിയുടെ നേതൃത്വത്തെ രണ്ട് തവണ എംപിയായ പാട്ടീൽ അഭിനന്ദിച്ചു.
അടുത്തിടെ നടന്ന നിയമസഭാ തിരഞ്ഞെടുപ്പിൽ ബിആർഎസ് പരാജയപ്പെട്ടതിന് ശേഷം പാർട്ടിയുടെ നിരവധി നേതാക്കൾ ബിജെപിയിലോ കോൺഗ്രസിലോ ചേരുന്നുണ്ട്. 
ഇന്ത്യയുടെ വികസനത്തിനായി മോദിക്ക് ഒരു കാഴ്ചപ്പാടുണ്ടെന്നും അതുകൊണ്ടാണ് കഴിഞ്ഞ 10 വർഷത്തിനിടെ രാജ്യം ഇത്രയധികം പ്രവർത്തനങ്ങൾ കണ്ടതെന്നും പാട്ടീൽ മാധ്യമപ്രവർത്തകരോട് പറഞ്ഞു.
ലോകത്തിലെ ഏറ്റവും വിശ്വസ്തനായ നേതാവായി അദ്ദേഹം അറിയപ്പെടുന്നു. രാമക്ഷേത്ര നിർമ്മാണം, ആർട്ടിക്കിൾ 370 റദ്ദാക്കൽ, മുത്തലാഖ് നിരോധനം, സൗജന്യ കോവിഡ് വാക്‌സിനുകൾ തുടങ്ങിയ വിഷയങ്ങളിൽ മോദി സർക്കാരിനെ അദ്ദേഹം പ്രശംസിക്കുകയും ചെയ്തു.