”ഞാന്‍ രണ്ടാം ക്ലാസില്‍ പഠിക്കുന്ന സമയത്താണ് അമ്മ മരിച്ചത്, അടുത്തവര്‍ഷം അച്ഛന്‍ വേറെ കല്യാണം കഴിച്ചു, പിന്നീട് ചെറിയമ്മയുടെ വീട്ടിലായിരുന്നു താമസം, എന്റെ കല്യാണം കഴിയുന്നത് വരെ ഞാന്‍ മാമന്റെ വീട്ടിലായിരുന്നു…”

മലയാളികളുടെ പ്രിയങ്കരനായ ഹരീഷ് കണാരന്‍ കോമഡി ഷോകളിലൂടെയാണ് താരമായത്. ഇതിലൂടെ സിനിമകളും ഹരീഷിനെ തേടിയെത്തി. ചെറുപ്പത്തിലെ മുതല്‍ കഷ്ടതകള്‍ അനുഭവിച്ച് വളര്‍ന്ന ഹരീഷ് ഒരു അഭിമുഖത്തില്‍ തന്റെ കുട്ടിക്കാലത്തെക്കുറിച്ചും അമ്മയുടെ വിയോഗത്തെക്കുറിച്ചുമൊക്കെ തുറന്നു പറയുകയാണ്… 
”സരോജിനി എന്നായിരുന്നു അമ്മയുടെ പേര്. ഞാന്‍ രണ്ടാം ക്ലാസില്‍ പഠിക്കുന്ന സമയത്താണ് അമ്മയ്ക്ക് ടിബി വന്ന് മരിച്ചത്. അടുത്തവര്‍ഷം അച്ഛന്‍ വേറെ കല്യാണം കഴിച്ചു. പിന്നീട് ചെറിയമ്മയുടെ വീട്ടിലായിരുന്നു താമസം. അമ്മയേക്കാള്‍ എനിക്ക് അടുപ്പം അച്ഛനോടായിരുന്നു. ചിലപ്പോള്‍ വയ്യാതെ കിടക്കുന്ന അമ്മ മരിക്കുമെന്ന് മനസിലായതു കൊണ്ടായിരിക്കും അച്ഛനോട് കൂടുതല്‍ അടുത്തത്. 
അമ്മ മരിച്ച സങ്കടം അറിയിക്കാതെയാണ് അച്ഛന്‍ എന്നെ വളര്‍ത്തിയത്. അമ്മയില്ലാത്ത കുട്ടിയല്ലേയെന്ന് കരുതി ഒന്നിനും വഴക്കു പറഞ്ഞിട്ടില്ല. രാമചന്ദ്രമേനോന്‍ എന്നായിരുന്നു അച്ഛന്റെ പേര്. സ്വകാര്യ ബാങ്കുദ്യോഗസ്ഥനായിരുന്നു. അച്ഛനും അമ്മയ്ക്കും ഞാന്‍ ഒരു മോനാണ്. അമ്മ മരിച്ചപ്പോള്‍ എല്ലാവരും പറഞ്ഞു ഇനി ഈ വീട്ടില്‍ നില്‍ക്കണ്ട മാറിത്താമസിക്കെന്ന്. അങ്ങനെ ഞങ്ങള്‍ പെരുമണ്ണയിലെ സ്വന്തം വീട്ടില്‍ നിന്നും തിരുവണ്ണൂരെ മാമന്റെ വീട്ടിലേക്ക് താമസം മാറ്റി.
മൂന്നാം ക്ലാസില്‍ പഠിക്കുമ്പോഴാണ് അച്ഛന്‍ വേറെ വിവാഹം കഴിച്ചത്. ചെറിയമ്മയുടെ പേര് തിലകം എന്നാണ്. പിന്നെ ഞാനും അച്ഛനും ചെറിയമ്മയുടെ വീട്ടിലേക്ക് മാറി. പെരുമണ്ണയിലെ ഞങ്ങളുടെ വീട് ആള്‍ത്താമസമില്ലാതെ നശിച്ചുപോയി. 
ഞാന്‍ പത്താം ക്ലാസില്‍ പഠിക്കുമ്പോഴാണ് മാമന്‍ പെരുമണ്ണയിലേക്ക് താമസം മാറ്റിയത്. ഞാനും അവര്‍ക്കൊപ്പം പോന്നു. എന്റെ കല്യാണം കഴിയുന്നത് വരെ പിന്നെ ഞാന്‍ അവര്‍ക്കൊപ്പമായിരുന്നു. എന്റെ മാമന്‍, അതായത് അമ്മയുടെ ഏട്ടന്‍, വിവാഹം കഴിച്ചത് എന്റെ അച്ഛന്റെ അനിയത്തിയെയാണ്. 
അച്ഛന്‍ എല്ലാ ആഴ്ചയും എന്നെ കാണാന്‍ പെരുമണ്ണയിലേക്ക് വരും. വേണ്ടതെല്ലാം വാങ്ങിച്ചു തരും. രണ്ടാമത്തെ വിവാഹത്തില്‍ അച്ഛന് ഒരു മകന്‍ കൂടിയുണ്ട്, ശ്രീകുമാര്‍. താമസം മാമന്റെ വീട്ടിലായിരുന്നതിനാല്‍ അനിയുമായി എനിക്ക് അത്ര അടുപ്പമുണ്ടായിരുന്നില്ല. മറിച്ച് മാമന്റെ മക്കളോടായിരുന്നു അടുപ്പം. എന്നാലിപ്പോള്‍ ഞാനും ശ്രീകുമാറും അടുത്തു. അച്ഛന്‍ ഏഴ് വര്‍ഷം മുമ്പ് മരിച്ചു. അനിയന്റെ കല്യാണസമയത്ത് അച്ഛന്റെ സ്ഥാനത്തു നിന്ന് എല്ലാം ചെയ്തത് ഞാനായിരുന്നു. അനിയന്‍ ഇപ്പോള്‍ ദുബായിലാണ്…”