വെള്ളക്കാറിലെത്തിയ അജ്ഞാതര്‍ തട്ടിക്കൊണ്ടുപോകാന്‍  ശ്രമിച്ചെന്ന് കള്ളക്കഥ; പോലീസിനെയും നാട്ടുകാരെയും ചുറ്റിച്ച് ആറാം ക്ലാസുകാരന്‍

കൊച്ചി: മട്ടാഞ്ചേരിയില്‍ വെള്ള കാറിലെത്തിയ അജ്ഞാതര്‍ തട്ടിക്കൊണ്ടുപോകാന്‍ ശ്രമിച്ചെന്ന് കള്ളക്കഥ പറഞ്ഞ് പോലീസിനെയും നാട്ടുകാരെയും ചുറ്റിച്ച് 12 വയസുകാരന്‍. വ്യാഴാഴ്ച വൈകിട്ട് അഞ്ചിനാണ് സംഭവം.
കൂവപ്പാടത്ത് താമസിക്കുന്ന ആറാം ക്ലാസുകാരനാണ് തട്ടിക്കൊണ്ടുപോകാന്‍ ശ്രമിച്ചവരില്‍ നിന്ന് രക്ഷപ്പെട്ടെന്നും ബാഗ് കാറില്‍ എത്തിയവരുടെ കൈവശമാണെന്നും വീട്ടുകാരെയും നാട്ടുകാരെയും അറിയിച്ചത്. തുടര്‍ന്ന് പോലീസില്‍ വിവരമറിയിക്കുകയായിരുന്നു. 
പോലീസെത്തി സമീപത്തെ സി.സി.ടിവി ക്യാമറകള്‍ പരിശോധിച്ചെങ്കിലും കാര്‍ കണ്ടെത്തിയില്ല. ഒടുവില്‍ കുട്ടിയോട് വിശദമായി കാര്യങ്ങള്‍ ചോദിച്ചതോടെ കുട്ടി കള്ളം പറയുകയാണെന്ന് മനസിലായി. കൊച്ചിയിലെ സ്‌കൂളില്‍ പഠിക്കുന്ന കുട്ടി പഠനകാര്യങ്ങളില്‍ നിന്ന് ഒഴിവാകാന്‍ നുണ പറയുകയായിരുന്നു.  കുട്ടിയുടെ ബാഗ് കൂവപ്പാടം കൊച്ചിന്‍ കോളജ് ഗ്രൗണ്ടിന് സമീപമുള്ള കടയുടെ പിന്നില്‍ ഒളിപ്പിച്ചനിലയില്‍ കണ്ടെത്തി.