സാമ്പത്തിക തട്ടിപ്പ് കേസ്: നിവിൻ പോളി ചിത്രം ‘തുറമുഖം’ സിനിമാ നിർമ്മാതാവ് അറസ്റ്റിൽ

തൃശ്ശൂർ: നിവിൻ പോളി കേന്ദ്ര കഥാപാത്രത്തിലെത്തിയ ‘തുറമുഖം’ എന്ന സിനിമയുടെ നിർമ്മാതാവ് അറസ്റ്റിൽ. സാമ്പത്തിക തട്ടിപ്പ് കേസിലാണ് അദ്ദേഹം അറസ്റ്റിലായിരിക്കുന്നത്.
പാട്ടുരായ്ക്കൽ സ്വദേശിയായ വെട്ടിക്കാട്ടിൽ വീട്ടിൽ ജോസ് തോമസിനെയാണ് (42) ജില്ലാ ക്രൈംബ്രാഞ്ച് എസിപി ആർ. മനോജ്കുമാറും സംഘവും ചേർന്ന് അറസ്റ്റ് ചെയ്തത്. തുറമുഖം എന്ന സിനിമ നിർമ്മിച്ച മൂന്ന് നിർമ്മാതാക്കളിൽ ഒരാളാണ് ജോസ് തോമസ്.
വ്യാജരേഖകളുണ്ടാക്കി സിനിമാനിർമ്മാണത്തിന് പണം കണ്ടെത്തിയതിനാണ് അറസ്റ്റ്. കോയമ്പത്തൂർ സ്വദേശി ഗിൽബർട്ട് ആണ് പരാതിക്കാരൻ വ്യാജ രേഖകൾ തയ്യാറാക്കി 8 കോടി 40 ലക്ഷം രൂപ കൈപറ്റി സിനിമ പിടിക്കുകയും പിന്നീട് തുക മടക്കി കൊടുക്കാത്തതിരിക്കുകയും ചെയ്‌തെന്നാണ് പരാതി. ഈസ്റ്റ് പോലീസെടുത്ത കേസ് ക്രൈംബ്രാഞ്ചിന് കൈമാറിയിരുന്നു. 
അഞ്ചുപേരുടെ പേരിൽ വ്യാജ പ്രൊഫൈലുകളും രേഖകളും ബിസിനസ് ആവശ്യത്തിലേക്ക് ഉണ്ടാക്കിയാണ് പ്രതി തുക സംഘടിപ്പിച്ചത്.  ഇത്തരത്തിൽ, കബളിപ്പിച്ചതിൻറെ പേരിൽ പ്രതിക്കെതിരെ ഒരു വർഷം മുൻപ് അഞ്ചു ക്രൈം കേസുകൾ ഈസ്റ്റ് പോലീസ് സ്റ്റേഷനിൽ രജിസ്റ്റർ ചെയ്തിരുന്നു.
അന്വേഷണസംഘത്തിൽ തൃശ്ശൂർ ജില്ലാ ക്രൈം ബ്രാഞ്ച് എ സി പി മനോജ് കുമാർ ആർ , ക്രൈം സ്‌കോഡംഗങ്ങളായ എസ് ഐ സുവ്രതകുമാർ,എസ് ഐ റാഫി പി എം, സീനിയർ സിപിഒ പളനിസ്വാമി  എന്നിവരാണ് ഉണ്ടായിരുന്നത്.