ക്രിക്കറ്റ് താരങ്ങളുടെ ബാ​ഗുകളിൽ മദ്യക്കുപ്പികൾ; ക്രിക്കറ്റ് കിറ്റിൽ ഒളിപ്പിച്ച് കടത്താൻ ശ്രമിച്ചത് 27 കുപ്പി മദ്യം; കുരുക്കിലായി സൗരാഷ്ട്ര താരങ്ങൾ

ഡൽഹി: സികെ നായിഡു ദേശീയ ക്രിക്കറ്റ് ടൂർണമെന്റ് കഴിഞ്ഞു മടങ്ങിയ അണ്ടർ 23 താരങ്ങളുടെ ബാ​ഗുകളിൽ നിന്നു മദ്യക്കുപ്പികൾ പിടിച്ചെടുത്തു.
ചണ്ഡീ​ഗഢിൽ കളിക്കാനെത്തി, മത്സരം കഴിഞ്ഞു മടങ്ങിയ സൗരാഷ്ട്ര താരങ്ങളുടെ ബാ​ഗുകൾ പരിശോധിച്ചപ്പോഴാണ് ഇവ കണ്ടെത്തിയത്. വിമാനത്താവളത്തിലാണ് പരിശോധന നടന്നത്.
​ഗുജറാത്തിൽ മദ്യ നിരോധനമുണ്ട്. സംഭവത്തിൽ സൗരാഷ്ട്ര ക്രിക്കറ്റ് അസോസിയേഷൻ അന്വേഷണം തുടങ്ങി. താരങ്ങൾ നടപടി നേരിടേണ്ടി വരും.
ഈ മാസം 25നാണു ചണ്ഡീ​ഗഢിനെ ടീം പരാജയപ്പെടുത്തിയത്. പിന്നാലെ സൗരാഷ്ട്ര ടീം ​ഗുജറാത്തിലേക്ക് മടങ്ങി. പ്രഷാം രാജ്ദേവ്, സമർഥ് ​ഗജ്ജർ, രക്ഷിത് മേത്ത, പർഷ്വരാജ് റാണ, സ്മിത്‍രാജ് ജലാനി എന്നിവരുടെ ബാ​ഗുകളിലാണ് മദ്യക്കുപ്പികൾ കണ്ടെത്തിയത്.
ക്രിക്കറ്റ് കിറ്റിനുള്ളിൽ ഒളിപ്പിച്ചു വച്ചായിരുന്നു കടത്താൻ ശ്രമിച്ചത്. 27 കുപ്പി മദ്യവും രണ്ട് കെയ്സ് ബിയറും പിടിച്ചെടുത്തതായാണ് പുറത്തു വന്ന വിവരം.