പിസിഒഎസ് പലവിധത്തിലുള്ള പ്രയാസങ്ങളും ജീവിതത്തില്‍ സൃഷ്ടിക്കാം. ഇത്തരത്തില്‍ പിസിഒഎസ് സൃഷ്ടിക്കാവുന്നൊരു പ്രതിസന്ധിയാണ് ഗര്‍ഭധാരണവുമായി ബന്ധപ്പെട് സങ്കീര്‍ണതകള്‍. പിസിഒഎസ് എന്ന് പറയുന്നത് ഒരു രോഗമല്ല, അവസ്ഥയാണ്. അടിസ്ഥാനപരമായി സ്ത്രീകളില്‍ ഹോര്‍മോണ്‍ വ്യതിയാനങ്ങളാണ് ഈ അവസ്ഥയിലുണ്ടാകുന്നത്.
ആര്‍ത്തവസംബന്ധമായ പ്രശ്നങ്ങളാണ് ഏറെയും നേരിടുക. ഇതിന് പുറമെ ശരീരത്തില്‍ മുഖത്തടക്കം അമിത രോമവളര്‍ച്ച, വിഷാദ രോഗം, അമിതവണ്ണം എന്നിങ്ങനെ പല പ്രയാസങ്ങളും പിസിഒഎസ് തീര്‍ക്കുന്നുണ്ട്. ഇതില്‍ ആര്‍ത്തവസംബന്ധമായ പ്രശ്നങ്ങള്‍ പിന്നീട് സ്ത്രീകളില്‍ ഗര്‍ഭധാരണത്തിലും സങ്കീര്‍ണത സൃഷ്ടിക്കാം. എന്നുവച്ചാല്‍ പിസിഒഎസുള്ള സ്ത്രീകള്‍ ഗര്‍ഭം ധരിക്കില്ലെന്നോ, ഗര്‍ഭധാരണം നടന്നാലും അത് തീര്‍ച്ചയായും സങ്കീര്‍ണമാകണമെന്നോ ഇല്ല.
പിസിഒഎസ് ഉള്ളവരില്‍ ഗര്‍ഭധാരണം നടക്കാൻ തന്നെ പ്രയാസമാണ്. കാരണം ഹോര്‍മോണുകളുടെ പ്രവര്‍ത്തനം ശരിയാംവിധത്തില്‍ അല്ലാത്തതിനാല്‍ അണ്ഡത്തിന്‍റെ വളര്‍ച്ചയും മറ്റും പ്രശ്നത്തിലാകും. അതുപോലെ ആര്‍ത്തവക്രമം തെറ്റാണെങ്കില്‍ അതും ഗര്‍ഭധാരണ സാധ്യത കുറയ്ക്കുന്നതിലേക്ക് നയിക്കും.
ആദ്യം ഭക്ഷണരീതി ആരോഗ്യകരമായി ക്രമീകരിക്കുക. സമയത്തിന് ഭക്ഷണം കഴിക്കുക. ബാലൻസ്ഡ് ആയി എല്ലാ പോഷകങ്ങളും ലഭിക്കുംവിധത്തിലുള്ള ഭക്ഷണം ഡയറ്റിലുള്‍പ്പെടുത്തുക. മധുരം കഴിവതും കുറയ്ക്കുക. ഫാബര്‍, ഒമേഗ 3 ഫാറ്റി ആസിഡ് എന്നിവയെല്ലാം കാര്യമായി അടങ്ങിയ ഭക്ഷണങ്ങള്‍ കൂടുതലായി കഴിക്കാം. നല്ലതുപോലെ വെള്ളം കുടിക്കുകയും വേണം. ഇത്രയും കാര്യങ്ങള്‍ ഡയറ്റില്‍ ശ്രദ്ധിക്കണം.
