ഒരു വശത്ത് അവര്‍ പോകാന്‍ തിരക്കിലായിരുന്നു. മറുവശത്ത് അവര്‍ ട്രാഫിക്കുണ്ടായിട്ടും പ്രശ്‌നമില്ലെന്ന് പറയുന്നു. എനിക്ക് അത് അല്‍പ്പം വിചിത്രമായി തോന്നി. ‘ബാഗിന്റെ ഭാരത്തില്‍ സംശയം തോന്നി; സുചനയെ കുടുക്കിയത് ഡ്രൈവറുടെ ഇടപെടല്‍

നാല് വയസ്സുള്ള മകനെ കൊലപ്പെടുത്തിയ ബെംഗളൂരു സിഇഒ സുചന സേത്തിനെ കുടുക്കിയത് ടാക്സി കാര്‍ ഡ്രൈവര്‍ റെയ്‌ജോണ്‍ ഡിസൂസയുടെ നിര്‍ണായക ഇടപെടല്‍. കൊലപാതകം നടന്നതായി വിവരം ലഭിച്ചതിന് പിന്നാലെ കാര്‍ അടുത്തുള്ള പൊലീസ് സ്റ്റേഷനിലേക്ക് ഇയാള്‍ വഴിതിരിച്ച് വിടുകയായിരുന്നു. സുചനയ്ക്ക് ഒരു സംശയവും തോന്നാത്ത രീതിയിലായിരുന്നു ഇയാള്‍ പൊലീസുമായി ആശയവിനിമയം നടത്തിയത്. സുചന സേത്തിന്റെ പെരുമാറ്റം തുടക്കം മുതല്‍ സംശയാസ്പദമായിരുന്നുവെന്ന് റെയ്ജോണ്‍ പറയുന്നു. അവരുടെ ബാഗിന് എന്താണ് ഇത്രയും ഭാരമെന്ന് പോലും ഒരു ഘട്ടത്തില്‍ ചോദിച്ചിരുന്നുവെന്നും അദ്ദേഹം കൂട്ടിച്ചേര്‍ത്തു.  ജനുവരി ഏഴിന് നോര്‍ത്ത് ഗോവയിലെ കണ്ടോലിമിലെ ‘സോള്‍ ബനിയന്‍ ഗ്രാന്‍ഡെ’ എന്ന സര്‍വീസ് അപ്പാര്‍ട്ട്‌മെന്റില്‍ നിന്ന് തനിക്ക് ഒരു കോള്‍ വന്നു. രാത്രി ഹോട്ടലില്‍ നിന്ന് ഒരാളെ അടിയന്തരമായി ബംഗളൂരുവിലേക്ക് കൊണ്ടുപോകണമെന്ന് പറഞ്ഞു. 12.30 ഓടെ ഞങ്ങള്‍ രണ്ട് ഡ്രൈവര്‍മാരാണ് അപ്പാര്‍ട്ട്മെന്റില്‍ എത്തിയത്. പുലര്‍ച്ചെ 1 മണിക്ക് സുചന ക്യാബില്‍ കയറി. അവരുടെ ബാഗ് റിസപ്ഷനില്‍ നിന്ന് എടുത്തുകൊണ്ട് വരാന്‍ അവര്‍ എന്നോട് ആവശ്യപ്പെട്ടു. ഞാന്‍ ഹോട്ടല്‍ റിസപ്ഷനില്‍ നിന്ന് ബാഗ് എടുത്തു. അത് കറുത്ത നിറമുള്ള ബാഗായിരുന്നു. നല്ല ഭാരമുണ്ടായിരുന്നു. എന്നാല്‍ അന്ന് എനിക്ക് അത്ര സംശയം തോന്നിയില്ല. പക്ഷേ എന്തിനാണ് ബാഗിന് ഇത്രയും ഭാരമെന്ന് മാഡത്തിനോട് ഞാന്‍ ചോദിച്ചു. അതില്‍ മദ്യക്കുപ്പികള്‍ ഉണ്ടോയെന്നും ചോദിച്ചു. അതെ മദ്യക്കുപ്പി ഉണ്ടെന്ന് മാഡം മറുപടി പറഞ്ഞു.’, റെയ്ജോണ്‍ പറഞ്ഞു.
യാത്രയിലുടനീളം സുചന സേത്ത് വളരെ നിശ്ശബ്ദയായിരുന്നുവെന്നും ഒരു കുപ്പി വെള്ളത്തിനായി ഒരിടത്ത് മാത്രം വാഹനം നിര്‍ത്തിയെന്നും ഡ്രൈവര്‍ പറഞ്ഞു. ഗോവ-കര്‍ണാടക അതിര്‍ത്തിയില്‍ ട്രാഫിക് ബ്ലോക്ക് ഉണ്ടായപ്പോള്‍ നാല് മണിക്കൂര്‍ വൈകി. പക്ഷേ ഒരിക്കല്‍ പോലും അവര്‍ അക്ഷമയുടെയോ പരിഭ്രാന്തിയുടെയോ ലക്ഷണങ്ങളൊന്നും കാണിച്ചില്ല. സര്‍വീസ് അപ്പാര്‍ട്ട്‌മെന്റില്‍ നിന്നുള്ള ഒരു കോള്‍ ഒഴികെ ആരെയെങ്കിലും വിളിക്കുകയോ ചെയ്തില്ലെന്നും റെയ്ജോണ്‍ ഓര്‍ത്തെടുത്തു. 
‘ട്രാഫിക് ജാം മാറാന്‍ 5-6 മണിക്കൂര്‍ എടുക്കുമെന്ന് ഞാന്‍ മാഡത്തോട് പറഞ്ഞു. വേണമെങ്കില്‍ ഒരു യു-ടേണ്‍ എടുത്ത് എയര്‍പോര്‍ട്ടില്‍ ഡ്രോപ്പ് ചെയ്യാമെന്നും വാഗ്ദാനം ചെയ്തു. എന്നാല്‍ അവര്‍ അത് നിഷേധിച്ചു, ട്രാഫിക് തടസ്സം മാറുമ്പോള്‍ നമുക്ക് പോകാമെന്നായിരുന്നു മറുപടി. പിന്നെ എനിക്ക് അത് അല്‍പ്പം വിചിത്രമായി തോന്നി. കാരണം ഒരു വശത്ത് അവര്‍ പോകാന്‍ തിരക്കിലായിരുന്നു. മറുവശത്ത് അവര്‍ ട്രാഫിക്കുണ്ടായിട്ടും പ്രശ്‌നമില്ലെന്ന് പറയുന്നു’, റെയ്ജോണ്‍ കൂട്ടിച്ചേര്‍ത്തു.
കാര്‍ കര്‍ണാടകയിലേക്ക് കടന്നപ്പോഴാണ് ഗോവ പോലീസ് റെയ്ജോണെ ബന്ധപ്പെട്ടത്. യുവതിക്കൊപ്പം ഒരു കുട്ടിയുണ്ടോയെന്നായിരുന്നു പൊലീസിന്റെ ചോദ്യം. കാരണം ചോദിച്ചപ്പോള്‍ യുവതിയുടെ മുറിയില്‍ രക്തക്കറ കണ്ടെത്തിയെന്ന് പോലീസ് പറഞ്ഞു. അവര്‍ ഒരു കുട്ടിയുമായാണ് എത്തിയതെന്നും എന്നാല്‍ പോകാന്‍ നേരം കുട്ടിയുണ്ടായിരുന്നില്ലെന്നും പൊലീസ് ഉറപ്പിച്ചു. പിന്നാലെ യുവതി നല്‍കിയ പേരും വിലാസവും വിശദാംശങ്ങളും വ്യാജമാണെന്ന് പോലീസില്‍ നിന്ന് മറ്റൊരു കോള്‍ കൂടി റെയ്ജോണ് ലഭിച്ചു. ‘എന്തോ കുഴപ്പമുണ്ടെന്ന് എനിക്ക് 100 ശതമാനം ഉറപ്പായി,’ ഡിസൂസ പറഞ്ഞു. ഇതോടെ കാര്‍ അടുത്തുള്ള പോലീസ് സ്റ്റേഷനില്‍ നിര്‍ത്താന്‍ പോലീസ് ആവശ്യപ്പെട്ടു.
‘ഞാന്‍ ഗൂഗിള്‍ മാപ്‌സില്‍ നോക്കിയെങ്കിലും അടുത്തുള്ള പോലീസ് സ്റ്റേഷനിലെത്താന്‍ ഒരു യു-ടേണ്‍ എടുക്കണമെന്ന് മനസിലായി.  ഞാന്‍ ഒരു യു-ടേണ്‍ എടുത്തിരുന്നെങ്കില്‍ അവര്‍ പരിഭ്രാന്തയാകുമായിരുന്നു. അതിനാല്‍ ഞാന്‍ അത് ചെയ്തില്ല. കര്‍ണാടകയിലെ ബോര്‍ഡുകള്‍ പ്രാദേശിക ഭാഷയിലായതിനാല്‍ മന്നും മനസ്സിലായില്ല. ഇതോടെ അടുത്ത് ഒരു റെസ്റ്റോറന്റില്‍ കാര്‍ നിര്‍ത്തി. പോലീസ് സ്റ്റേഷന്‍ എവിടെയാണെന്ന് ഗാര്‍ഡിനോട് അന്വേഷിച്ചു.’, ഡ്രൈവര്‍ പറഞ്ഞു. 
‘കാര്‍ നേരെ പൊലീസ് സ്റ്റേഷനിലേക്ക് പോയി. സ്റ്റേഷനിലെത്തിയ ഉടന്‍, മാഡം ചോദിച്ചു, നിങ്ങള്‍ എന്തിനാണ് എന്നെ ഇവിടെ കൊണ്ടുവന്നതെന്ന്. എനിക്ക് പോലീസില്‍ നിന്ന് ധാരാളം കോളുകള്‍ വരുന്നുണ്ടെന്ന് ഞാന്‍ അവേരാട് പറഞ്ഞു. അവര്‍ക്ക് നിങ്ങളോട് സംസാരിക്കണമെന്നും അറിയിച്ചു. പിന്നാലെ കാര്‍ പോലീസിന് കൈമാറി. അവര്‍ വാഹനം പരിശോധിച്ചപ്പോള്‍ ബാഗിനുള്ളില്‍ കുട്ടിയുടെ മൃതദേഹം കണ്ടെത്തുകയും ചെയ്തു. മൃതദേഹം കണ്ടെത്തിയപ്പോഴും അവര്‍ക്ക് ഒരു കൂസലുമില്ലായിരുന്നു. ‘ റെയ്ജോണ്‍ കൂട്ടിച്ചേര്‍ത്തു. 
തിങ്കളാഴ്ച കര്‍ണാടകയിലെ ചിത്രദുര്‍ഗയില്‍ വെച്ചാണ് 39 കാരിയായ സംരംഭകയെ അറസ്റ്റ് ചെയ്തത്. ഇവരെ ഗോവയിലെ ഒരു പ്രാദേശിക കോടതി ആറ് ദിവസത്തെ പോലീസ് കസ്റ്റഡിയില്‍ വിട്ടു. ബെംഗളൂരു ആസ്ഥാനമായ മൈന്‍ഡ്ഫുള്‍ എഐ ലാബിന്റെ സിഇഒയായിരുന്നു സുചന സേത്ത്. ബംഗാള്‍ സ്വദേശിനിയായ ഇവര്‍ മലയാളിയായ ഭര്‍ത്താവുമായി വേര്‍പിരിഞ്ഞ് കഴിയുകയായിരുന്നു.  എല്ലാ ഞായറാഴ്ചകളില്‍ പിതാവിന് മകനെ കാണാമെന്ന കോടതി ഉത്തരവില്‍ ഇവര്‍ അസ്വസ്ഥയായിരുന്നുവെന്നും ഭര്‍ത്താവ് മകനെ കാണാതിരിക്കാനാണ് കൊലപാതകം നടത്തിയതെന്നും ആദ്യം റിപ്പോര്‍ട്ടുകള്‍ പുറത്തുവന്നിരുന്നു