പാലക്കാട്: അട്ടപ്പാടി വനമേഖലയില്‍ കഴിഞ്ഞ രണ്ടു ദിവസങ്ങളിലായി നടത്തിയ തിരച്ചിലില്‍ കഞ്ചാവ് തോട്ടങ്ങള്‍ കണ്ടെത്തി. ഭൂതയാറിലും കുറുക്കത്തിക്കല്ലു ഊരിന് സമീപവുമാണ് വിളവെടുപ്പിന് പാകമായത് ഉള്‍പ്പെടെ അറുന്നൂറോളം കഞ്ചാവ് ചെടികള്‍ കണ്ടെത്തി നശിപ്പിച്ചത്.
അഗളി എക്സൈസ് റേഞ്ച് ഓഫീസും ജനമൈത്രി എക്സൈസ് സ്‌ക്വാഡും, പുതുര്‍ ഫോറസ്റ്റ് റേഞ്ച് പാര്‍ട്ടിയും സംയുക്തമായിട്ടാണ് മേലെ ഭൂതയാറില്‍ പുലര്‍ച്ചെ അതിസാഹസികമായി തിരച്ചില്‍ നടത്തിയത്. വിളവെടുപ്പിന് പാകമായ 176 കഞ്ചാവ് ചെടികളും പുതുതായി വച്ച് പിടിപ്പിക്കാന്‍ നഴ്സറി പോലെ പരിപാലിച്ച് വളര്‍ത്തിയ 328 കഞ്ചാവ് തൈകളും റെയ്ഡില്‍ കണ്ടെത്തി.
അഗളി എക്സൈസ് ഇന്സ്പെക്ടര് ജി. സന്തോഷ് കുമാറിന്റെ നേതൃത്വത്തിലായിരുന്നു റെയ്ഡ്. സിവില്‍ എക്സൈസ് ഓഫീസര്‍മാരായ ബോജന്‍, ലക്ഷ്മണന്‍, ഹരിദാസ്, പ്രദീപ്, നവാസ്, എക്സൈസ് ഡ്രൈവര്‍ അനൂപ്, ബീറ്റ് ഫോറസ്റ്റ് ഓഫീസര്‍ അനു, ഫോറസ്റ്റ് വാച്ചര്‍മാരായ ചന്ദ്രന്‍, രാജന്‍ എന്നിവര്‍ പാര്‍ട്ടിയിലുണ്ടായിരുന്നു.
മണ്ണാര്‍ക്കാട് എക്സൈസ് സര്‍ക്കിള്‍ ഇന്സ്പെക്ടര് ആദര്‍ശും സംഘവും ഐബിയിലെ പ്രിവന്റ്ീവ് ഓഫീസര്‍ ആര്‍.എസ്. സുരേഷ് ശേഖരിച്ച വിവരത്തിന്റെ അടിസ്ഥാനത്തില്‍ കുറക്കത്തിക്കല്ല് ഊരില്‍ നടത്തിയ റെയ്ഡില്‍ മൂന്നു മാസം പ്രായമുള്ള 40 കഞ്ചാവ് ചെടികളും രണ്ട് മാസം പ്രായമുള്ള 31 കഞ്ചാവ് ചെടികളും ഉള്‍പ്പെടെ ആകെ 71 കഞ്ചാവ് ചെടികള്‍ കണ്ടെത്തി. ഐബി ഇന്സ്പെക്ടര് നൗഫല്‍ എന്‍, പ്രിവന്റിവ് ഓഫീസര്‍മാരായ ആര്‍.എസ് സുരേഷ്, വിശ്വകുമാര്‍, പ്രസാദ് കെ, മണ്ണാര്‍ക്കാട് സര്‍ക്കിളിലെ പ്രിവന്റീവ് ഓഫീസര്‍ വിനോദ് എം.പി, അഗളി എക്സൈസ് റേഞ്ച് സിവില്‍ എക്സൈസ് ഓഫീസര്‍മാരായ സുരേഷ് കെ, സുനീഷ് വി എക്സൈസ് ഡ്രൈവര്‍മാരായ കന്നഡസന്‍ കെ, അനൂപ്, മുക്കാലി ബീറ്റ് ഫോറസ്റ്റ് ഓഫീസര്‍ ജിഷ്ണു, പൊന്നുസ്വമി എന്നിവര്‍ റെയ്ഡില്‍ പങ്കെടുത്തു.
അട്ടപ്പാടി വനമേഖലയില്‍ വിളവെടുപ്പിന് പാകമായ കഞ്ചാവ് തോട്ടങ്ങള്‍; എക്സൈസ് അതിസാഹസികമായി നടത്തിയ തെരച്ചിലില്‍ കണ്ടെത്തിയത് അറുന്നൂറോളം കഞ്ചാവ് ചെടികള്‍
Byadmin
Dec 14, 2023