മംഗളൂരുവില്‍ നടന്ന പ്രഷര്‍ കുക്കര്‍ സ്ഫോടനക്കേസില്‍ കുറ്റപത്രം സമര്‍പ്പിച്ച് ദേശീയ അന്വേഷണ ഏജന്‍സി. കേസിലെ രണ്ട് പ്രതികള്‍ക്കെതിരെയാണ് എന്‍ഐഎ കുറ്റപത്രം സമര്‍പ്പിച്ചത്. സ്ഫോടനത്തിന് പിന്നില്‍ ഇസ്ലാമിക് സ്റ്റേറ്റ് (ഐഎസ്) ആണെന്നാണ് സൂചന. ഖിലാഫത്ത് (ശരീഅത്ത് നിയമം) സ്ഥാപിക്കാനുള്ള ഗൂഢാലോചനയുടെ ഭാഗമായി പ്രതികളായ മുഹമ്മദ് ഷാരിഖും സയ്യിദ് യാസിനും ചേര്‍ന്നാണ് സ്ഫോടനം നടത്തിയതെന്ന് എന്‍ഐഎ പറയുന്നു. ഇരുവരും ഒരു ഓണ്‍ലൈന്‍ ഹാന്‍ഡ്‌ലറുമായി ചേര്‍ന്ന് സ്ഫോടനം ആസൂത്രണം ചെയ്തു. ഈ ഗൂഢാലോചന പ്രകാരം മുഹമ്മദ് ഷാരിഖ് പ്രഷര്‍ കുക്കര്‍ ഐഇഡി തയ്യാറാക്കുകയും സയ്യിദ് സ്ഫോടകവസ്തുവിനുള്ള സാമഗ്രികള്‍ നല്‍കുകയുംചെയ്തു. കഴിഞ്ഞ വര്‍ഷം നവംബര്‍ 19 ന് ആയിരുന്നു സ്ഫോടനം.
മുഹമ്മദ് ഷാരിഖ് ഒരു ഓട്ടോറിക്ഷയില്‍ പ്രഷര്‍ കുക്കര്‍ ഐഇഡി കൊണ്ടുപോകുകയായിരുന്നു. പിന്നാലെ പെട്ടെന്ന് ഒരു വലിയ സ്ഫോടനം ഉണ്ടായി. മംഗളൂരുവിലെ കദ്രി മഞ്ജുനാഥ ക്ഷേത്രത്തിന് സമീപം വെച്ചായിരുന്നു സ്ഫോടനം. പ്രദേശത്ത് ഭീകരത സൃഷ്ടിക്കാന്‍ ഐഇഡി സ്ഫോടനം നടത്താന്‍ പ്രതികള്‍ പദ്ധതിയിട്ടിരുന്നു. എന്നാല്‍ തീവ്രത കുറഞ്ഞ ആ ബോംബ് വഴിയില്‍ വച്ച് അബദ്ധത്തില്‍ പൊട്ടിത്തെറിക്കുകയായിരുന്നു.
ഇതുമായി ബന്ധപ്പെട്ട്, 2022 നവംബര്‍ 23 ന് ഐപിസി സെക്ഷന്‍ 120 ബി, 307, എക്‌സ്‌പ്ലോസീവ് സബ്സ്റ്റന്‍സസ് ആക്റ്റ് 1908 സെക്ഷന്‍ 3, 4, 5 എന്നിവ പ്രകാരം കേസെടുത്തു. ഈ കേസിന്റെ അന്വേഷണം എന്‍ഐഎയ്ക്ക് കൈമാറി. അന്വേഷണത്തിനിടെ 2023 ജൂലൈയില്‍ പ്രതി ഷാരിഖിനെയും കൂട്ടുപ്രതി സയ്യിദ് ഷാരിഖിനെയും എന്‍ഐഎ സംഘം അറസ്റ്റ് ചെയ്തു. പ്രതികളെ പ്രോസിക്യൂട്ട് ചെയ്യുന്നതിനിടെയാണ് എന്‍ഐഎ ബുധനാഴ്ച കുറ്റപത്രം സമര്‍പ്പിച്ചത്.
2020 നവംബറില്‍ മംഗളൂരു നഗരത്തില്‍ തീവ്രവാദ അനുകൂല ഗ്രാഫിറ്റിയുടെ പേരില്‍ കര്‍ണാടക പോലീസ് അറസ്റ്റ് ചെയ്തപ്പോഴാണ് പ്രതി ഷാരിഖ് ആദ്യമായി സുരക്ഷാ സേനയുടെ റഡാറില്‍ വന്നത്. ആഗോള ഭീകര സംഘടനയായ ഇസ്ലാമിക് സ്റ്റേറ്റിനെ (ഐഎസ്) പിന്തുണച്ച് ഷാരിഖും കൂട്ടാളികളും പോസ്റ്റര്‍ പതിച്ചിരുന്നു.
തുടര്‍ന്ന് 2022 ലെ ശിവമോഗ ഐഎസ് ഗൂഢാലോചന കേസിലും ഷാരിഖിന്റെ പേര് ഉള്‍പ്പെടുത്തിയിട്ടുണ്ട്. അതില്‍ ഇതുവരെ 10 പ്രതികള്‍ അറസ്റ്റിലായിട്ടുണ്ട്.അറസ്റ്റിലായ 10 പേരില്‍, ഷാരിഖ്, സയ്യിദ് യാസിന്‍ എന്നിവരുള്‍പ്പെടെ ഒമ്പത് പേര്‍ക്കെതിരെ 2023 ജൂണ്‍ 30-ന് കുറ്റപത്രം രജിസ്റ്റര്‍ ചെയ്തു. മുസ്ലീം യുവാക്കളെ തീവ്രവാദത്തിലേക്ക് ആകര്‍ഷിക്കാന്‍ ശ്രമിക്കുകയും റിക്രൂട്ട് ചെയ്യുകയും ഫണ്ട് ശേഖരണം നടത്തുകയും ഐഎസിന്റെ ഇന്ത്യാ വിരുദ്ധ പ്രവര്‍ത്തനങ്ങള്‍ക്ക് വേണ്ടിയുള്ള പരീക്ഷണ സ്ഫോടനങ്ങള്‍ നടത്തുകയും ചെയ്തെന്നാണ് കുറ്റപത്രത്തില്‍ പറയുന്നത്.
കഴിഞ്ഞ വര്‍ഷം ഡിസംബര്‍ ഒന്നിനാണ് കേസ് എന്‍ഐഎ ഏറ്റെടുത്തത്. നവംബര്‍ 19 ശനിയാഴ്ച മംഗളൂരുവില്‍ ഓടിക്കൊണ്ടിരിക്കുന്ന ഒരു ഓട്ടോറിക്ഷ പൊട്ടിത്തെറിച്ച സംഭവം ചുഴുളഴിച്ചത് ഒരു തീവ്രവാദ ഗൂഢാലോചനയിലേക്കായിരുന്നു. ഫോറന്‍സിക് സയന്‍സ് ലബോറട്ടറി വിഭാഗം (എഫ്എസ്എല്‍) സംഘം അടുത്ത ദിവസം മൈസൂരില്‍ ഷാരിഖ് വാടകയ്‌ക്കെടുത്ത വീട്ടിലെത്തി സ്‌ഫോടകവസ്തുക്കള്‍ നിര്‍മ്മിക്കാന്‍ ഉപയോഗിച്ച വസ്തുക്കള്‍ കണ്ടെടുത്തിരുന്നു.
സ്‌ഫോടകവസ്തുക്കള്‍ നിര്‍മ്മിക്കാന്‍ ഉപയോഗിക്കുന്ന ജലാറ്റിന്‍ പൗഡര്‍, സര്‍ക്യൂട്ട് ബോര്‍ഡുകള്‍, ചെറിയ ബോള്‍ട്ടുകള്‍, ബാറ്ററികള്‍, മൊബൈല്‍ ഫോണുകള്‍, മരം പവര്‍, അലുമിനിയം മള്‍ട്ടിമീറ്ററുകള്‍, വയറുകള്‍, മിശ്രിതം ജാറുകള്‍, പ്രഷര്‍ കുക്കറുകള്‍ തുടങ്ങിയവ എഫ്എസ്എല്‍ സംഘം കണ്ടെടുത്തു.
മുഖ്യപ്രതിയായ ഷാരിഖിന് ഇസ്ലാമിക് സ്റ്റേറ്റുമായി ബന്ധമുണ്ടെന്നും സഹപാഠികളായ സയ്യിദ് യാസിന്‍, മുനീര്‍ അഹമ്മദ് എന്നിവരെ തീവ്രവാദികളാക്കി ഐഎസിലില്‍ ചേര്‍ക്കാന്‍ ശ്രമിച്ചിരുന്നതായും കണ്ടെത്തി. ഇവര്‍ മൂവരും ചേര്‍ന്ന് ശിവമോഗ ജില്ലയിലെ തുംഗ നദിയുടെ തീരത്ത് പരീക്ഷണ സ്ഫോടനം നടത്തിയതായും പിന്നീട് കണ്ടെത്തി. വൃത്തങ്ങള്‍ പറയുന്നതനുസരിച്ച്, പ്രധാന പ്രതിയായ ഷാരിഖിന് ഈ പ്രവര്‍ത്തനങ്ങള്‍ക്കെല്ലാം ഓര്‍കെസ്‌ട്രേറ്റ് ചെയ്യുകയും നിര്‍ദ്ദേശങ്ങള്‍ നല്‍കുകയും ചെയ്യുന്ന ഒരു ഹാന്‍ഡ്‌ലര്‍ ഉണ്ടായിരുന്നു.
