മോശം ജീവിതരീതികള്‍ ആണ് വര്‍ധിച്ചുവരുന്ന ഹൃദയാഘാതങ്ങള്‍ക്ക് കാരണം എന്ന് പല പഠനങ്ങളും ആഗോളതലത്തില്‍ തന്നെ ചൂണ്ടിക്കാട്ടുന്നുണ്ട്. എന്നാൽ ഇതിനിടെ കൊവിഡ് 19 രോഗവും ഹൃദയാഘാതത്തിലേക്ക് നയിക്കുന്നുവോ എന്ന സംശയവും ശക്തമായി നില്‍ക്കുന്നുണ്ട്. ഇതില്‍ വിദഗ്ധര്‍ നൽകുന്ന വിശദീകരണമാണ് ഇനി പങ്കുവയ്ക്കുന്നത്.
ഈ വിഷയത്തില്‍ ഐസിഎംആര്‍ നടത്തിയൊരു പഠനപ്രകാരം കൊവിഡിനെക്കാൾ പാരമ്പര്യഘടകങ്ങളാണ് കൂടുതലും 18- 40 വരെ പ്രായമുള്ളവരില്‍ ഹൃദയാഘാതത്തിന് കാരണമായി വരുന്നത്. പുകവലി, മദ്യപാനം, കഠിനമായ വ്യായാമം എന്നിങ്ങനെയുള്ള ഘടകങ്ങള്‍ കൂടിയാകുമ്പോള്‍ ‘റിസ്ക്’ ഇരട്ടിക്കുകയാണെന്നും ഐസിഎംആര്‍ തങ്ങളുടെ റിപ്പോര്‍ട്ടില്‍ വ്യക്തമാക്കുന്നു.
നേരത്തെ ഹൃദയസംബന്ധമായ പ്രശ്നങ്ങളുള്ളവരില്‍ കൊവിഡ് വരുമ്പോള്‍ ശ്രദ്ധിക്കണമെന്നും വിദഗ്ധര്‍ പറയുന്നു. കാരണം ഈ സാഹചര്യത്തില്‍ ഹൃദയസംബന്ധമായ പ്രശ്നങ്ങള്‍ക്ക് സാധ്യത ഇരട്ടിക്കുകയും ഹൃദയാഘാതം വരെയുള്ള സങ്കീര്‍ണതകളിലേക്ക് നയിക്കപ്പെടുകയും ചെയ്യുന്നു.
കൊവിഡ് വൈറസ് നേരിട്ട് ഹൃദയത്തിന് ദോഷമാകുന്നില്ല. പക്ഷേ പരോക്ഷമായി ഹൃദയാരോഗ്യത്തെ ഇത് പ്രശ്നത്തിലാക്കുന്നു. ഹൃദയസംബന്ധമായ പ്രശ്നങ്ങളുള്ളവര്‍ക്ക് കൊവിഡ് ബാധിച്ചതിന് ശേഷം ശ്വാസതടസം, നെഞ്ചുവേദന പോലുള്ള ലക്ഷണങ്ങള്‍ കാണുന്ന പക്ഷം ഉടൻ തന്നെ ആശുപത്രിയിൽ പ്രവേശിപ്പിക്കുന്നതാണ് ഉചിതം.
