സന്ദർശന വിസയിൽ സൗദിയിലെത്തിയ കോട്ടയം സ്വദേശി മരണപ്പെട്ടു; അതേ ആശുപത്രിയിൽ ആന്തരികാവയവങ്ങൾ ദാനം ചെയ്തു; മൃതദേഹം നാട്ടിലേയ്ക്ക്

ജിദ്ദ: റിയാദ് പ്രവിശ്യയിലെ അൽഖർജ് കിംഗ് ഖാലിദ് ആശുപത്രിയിൽ വെച്ച് കഴിഞ്ഞ ദിവസം ഹൃദയാഘാതം മൂലം മരണപ്പെട്ട മലയാളിയുടെ ആന്തരിക അവയവങ്ങൾ അതേ ആശുപത്രിയ്ക്ക് ദാനമായി നൽകിയതായി അവിടുത്തെ സ്​റ്റാഫ്​ നേഴ്‌സ് കൂടിയായ ഏക മകൾ പിങ്കി അറിയിച്ചു. മൃതദേഹം സംസ്കരിക്കുന്നതിനായി നാട്ടിലെത്തിക്കാനുള്ള നടപടികൾ പുരോഗമിക്കുന്നതായും അവർ പറഞ്ഞു. 
കോട്ടയം മേവള്ളൂർ വെള്ളൂർ, ചാമക്കാലയിൽ വീട്ടിൽ തച്ചേത്തുപറമ്പിൽ വർക്കി ജോസ്​ (61) ആണ്​ മരിച്ചത്​. ഭാര്യ: മേരി. തബൂക്കിലെ നിയോം സിറ്റിയിൽ ജോലി ചെയ്യുന്ന ജിൻസ്​ ഏക മകനാണ്. 
നാല് മാസങ്ങൾക്ക് മുമ്പാണ് പിങ്കിയുടെ അടുത്തേക്ക് സന്ദർശന വിസയിൽ വർക്കി എത്തിയത്. മരണം സംഭവിക്കുന്നതിന് 20 ദിവസം മുമ്പ്​ മസ്​തിഷ്കാഘാതമുണ്ടാവുകയും അതിനെത്തുടർന്ന് കിംഗ് ഖാലിദ്​ ആശുപത്രിയിലെ അത്യാഹിത വിഭാഗത്തിൽ  ചികിത്സയിൽ  കഴിയുകയുമായിരുന്നു. അതിനിടയിലാണ് അന്ത്യം. 
തുടർന്ന്, കുടുംബത്തിന്റെ അനുമതിയോടെ ആന്തരികാവയവങ്ങൾ വൃക്ക, കരൾ, നേത്രപടലം എന്നിവ ദാനമായി ​മറ്റ്​ രോഗികൾക്ക്​ മാറ്റിവെച്ചതായി ഇതിന് മുന്നിൽ നിന്ന മകൾ പിങ്കി വിവരിച്ചു. 
സൗദിയിൽ തന്നെ ജോലി ചെയ്യുന്ന ഏക സഹോദരൻ ജിൻസ്​, മറ്റ്​ കുടുംബാംഗങ്ങൾ എന്നിവരുമായി ആലോചിച്ച ശേഷം പിങ്കി സമ്മതപത്രത്തിൽ ഒപ്പിട്ട് നൽകുകയായിരുന്നു. 
മൃതദേഹം നാട്ടിലെത്തിക്കാനുള്ള നടപടിക്രമങ്ങൾ പുരോഗമിക്കുന്നു.