കോട്ടയം കൊക്കോ ലാറ്റക്സ് നിർമാണ ഫാക്ടറിയിൽ വൻ തീപിടിത്തം; തീപിടിത്തതിനു കാരണം പടക്കം പൊട്ടിച്ചതാണെന്ന് സൂചന, ആളപായമില്ല

കോട്ടയം: മൂന്നിലവിലെ കൊക്കോ ലാറ്റക്സ് നിർമാണ ഫാക്ടറിയിൽ തീപിടിത്തം. ദീപവലി ആഘോഷത്തിന്റെ ഭാ​ഗമായി പടക്കം പൊട്ടിച്ചതാണ് തീപിടിത്തതിനു കാരണമെന്നാണ് സൂചന. രാത്രി 7.30ഓടെയാണ് തീ ആളിപ്പടർന്നത്. 
നിലവിൽ ആളപായമൊന്നും റിപ്പോർട്ട് ചെയ്തിട്ടില്ല. അപകടം നടക്കുമ്പോൾ ഫാക്ടറിയുടെ ഉള്ളിൽ ആരുമുണ്ടായിരുന്നില്ലെന്നാണ് റിപ്പോർട്ട്.
കാഞ്ഞിരപ്പള്ളി, പാലാ എന്നിവിടങ്ങളിൽ നിന്നുള്ള അ​ഗ്നിശമന സേനാ സംഘങ്ങൾ സ്ഥലത്തെത്തി തീ അണയ്ക്കാനുള്ള ശ്രമം തുടരുന്നു. ഫാക്ടറിയിലേക്ക് എത്താനുള്ള പാലം തകർന്നു കിടക്കുന്നത് രക്ഷാപ്രവർത്തനം ദുഷ്കരമാക്കുന്നു.
ഇതര സംസ്ഥാന തൊഴിലാളികൾ ദീപാവലി ആഘോഷങ്ങളുടെ ഭാ​ഗമായി പരിസരത്തു നിന്നു പടക്കം പൊട്ടിച്ചിരുന്നു. ഇതിനു പിന്നാലെയാണ് വൻ തീപിടിത്തം ഉണ്ടായതെന്നു പ്രദേശ വാസികൾ പറയുന്നു. എന്നാൽ ഇക്കാര്യം പൊലീസോ, ഫയർ ഫോഴ്സോ സ്ഥിരീകരിച്ചിട്ടില്ല.