അക്ഷര നഗരിയിലേക്ക് അക്ഷര ശ്ലോകവുമായി പയസ്വിനി അബുദാബി

അബുദാബി: ഷാർജ അന്താരാഷ്ട്ര പുസ്തകമേളയിൽ അക്ഷരശ്ലോകം അവതരിപ്പിക്കുവാൻ അബുദാബിയിലെ കാസർഗോടുകാരുടെ കുടുംബ കൂട്ടായ്മയായ പയസ്വിനി അബുദാബിയുടെ ബാലവേദിയായ `കളിപ്പന്തലിന്റെ’ ഇരുപത്തിനാലു കുട്ടികൾ എത്തുന്നു. 
പുസ്തകോത്സവം അവസാന ദിവസമായ നവംബർ 12 ന് രാവിലെ പത്തുമണിക്കാണ് മനോജ്ഞം മലയാളം പരിപാടിയുടെ ഭാഗമായി കുട്ടികൾ അക്ഷരശ്ലോകം അവതരിപ്പിക്കുന്നത്. 
ഒന്നാം ക്ലാസ്സു മുതൽ ഒൻപതാം ക്ലാസ്സുവരെ പഠിക്കുന്ന ഇരുപത്തിനാല് കുട്ടികളാണ് പങ്കെടുക്കുന്നത്. കുട്ടികളെ നാലു ടീമുകളായി തരംതിരിച്ചാണ് അവതരണം. ടീമുകളുടെ പേരിൽ തന്നെ കാണാം ഏറെ പുതുമ. ഇന്ദ്രവജ്ര, വസന്തതിലകം, കുസുമമഞ്ജരി, പഞ്ചചാമരം എന്നിങ്ങനെ മലയാളത്തിലെ സംസ്കൃതവൃത്തങ്ങളുടെ പേരിൽ നാലു ടീമുകളായാണ് കുട്ടികൾ അക്ഷരശ്ലോകം അവതരിപ്പിക്കുന്നത്. 
ഷാർജ പുസ്തകോത്സവത്തിൽ ഒരു പക്ഷെ ഇതാദ്യമായിട്ടായിരിക്കും അക്ഷരശ്ലോകം സംഘടിപ്പിക്കുന്നത്. സ്കൂൾ സിലബസ്സിന്റെ ഭാഗമായി മലയാളഭാഷ പഠിക്കാൻ അവസരം ലഭിക്കാത്തതു കൊണ്ടുതന്നെ സാധാരണഗതിയിൽ മലയാളം അത്ര വഴങ്ങാത്ത പ്രവാസി കുട്ടികൾക്കൊരു മാതൃക ആയിരിക്കും പയസ്വിനി കളിപ്പന്തൽ കുട്ടികളുടെ ഈ ഉദ്യമം. 
മാസങ്ങൾ നീണ്ട പരിശീലനത്തിനൊടുവിൽ നല്ല ആത്മ വിശ്വാസത്തോടെയാണ് കുട്ടികൾ പരിപാടിക്കായി പങ്കെടുക്കാൻ ഒരുങ്ങുന്നത്. അബുദാബിയിൽ നിന്ന് രണ്ടു ബസുകളിലായി ആഘോഷമായാണ് കുട്ടികളും പയസ്വിനി കുടുംബങ്ങളും ഷാർജയിലേക്ക് പോകുന്നതെന്ന് ഭാരവാഹികൾ പറഞ്ഞു. 
കളിപ്പന്തൽ കോർഡിനേറ്ററും അബുദാബിയിൽ മലയാളം മിഷൻ അദ്ധ്യാപകനുമായ രമേശ് ദേവരാഗമാണ് കുട്ടികൾക്ക് വേണ്ട പരിശീലനം നൽകുന്നത്. കൂടെ പുസ്തകോത്സവ നഗരിയിൽ വേണ്ട എല്ലാ സഹായങ്ങളുമായി  മനോജ്ഞം മലയാളം കോർഡിനേറ്റർ മനോജ് കളരിക്കലുമുണ്ട്.