ഓർമകൾ പങ്കുവെച്ച് കപ്പലോട്ടക്കാരുടെ സംഗമം

കാസർകോട് –  അനുഭവങ്ങൾ ജീവിത പാഠമാക്കിയവരാണ് കപ്പൽ ജീവനക്കാർ.ആ  ജീവിതത്തോട് വിടപറഞ്ഞവർ കോട്ടിക്കുളം മർച്ചന്റ് നേവി ക്ലബ്ബിൽ സീമെൻസ് ഐക്യദിനത്തിൽ സംഗമിച്ചപ്പോൾ കടലിലും  കപ്പലിലും ഉണ്ടായ  സമ്മിശ്ര വികാരങ്ങളും അനുഭവങ്ങളും പങ്കുവെക്കാനുള്ള അവസരമായി. ആകസ്മികമായി മരണപ്പെട്ട സഹപ്രവർത്തകന്റെ മൃതദേഹം നടുക്കടലിൽ കെട്ടിത്താഴ്ത്തിയ രംഗം, കുടുംബത്തിൽ നിന്ന് ഉറ്റവരുടെ ഒരു കത്ത് കിട്ടാൻ മൂന്ന് മാസം വരെ കാത്തിരുന്ന കാലം, അടിയന്തര സാഹചര്യത്തിൽ ഊണും ഉറക്കവുമില്ലാതെ ദിവസങ്ങളോളം  കഴിയേണ്ടി വന്ന നിസ്സഹായത വരെ തുരുമ്പിക്കാത്ത മനസ്സിൽ നിന്ന് അവർ  പൊടിതട്ടി പുറത്തെടുത്തു. നവംബർ 6  സീമെൻസ് യൂനിറ്റി ഡേ   ആണ്  കപ്പലോട്ടക്കാർക്ക്. അത്  ആഘോഷിക്കാൻ കണ്ണൂർ, കാസർകോട് ജില്ലയിൽ നിന്നുള്ള  മർച്ചന്റ് നേവി ക്ലബ് അംഗങ്ങൾ പാലക്കുന്നിലുള്ള ക്ലബ്ബിൽ സംഗമിച്ചു.
65 ഉം 75 ഉം വയസ്സ് പിന്നിട്ടവരെ പൊന്നാട ചാർത്തിയും   പുരസ്‌കാരവും പണക്കിഴിയും നൽകിയും ആദരിക്കുന്ന ചടങ്ങ് കൂടിയായി ഈ സംഗമം. 65 പിന്നിട്ട ഷെയ്ക്ക് ഹുസൈൻ (ബേക്കൽ), കെ. കെ. ചന്ദ്രൻ(പള്ളം), ഹര ിചന്ദ്ര ബേക്കൽ (മംഗ്ലൂർ), ഉമേശൻ വേലായുധൻ (കാസർകോട് ), 75 പിന്നിട്ട അബ്ദുൽ ഗഫൂർ (ബേക്കൽ), സി.എം. ദാമോദരൻ (കണ്ണൂർ), വി. സത്യാനന്ദൻ (അജാനൂർ) എന്നിവരെയാണ് ആദരിച്ചത്.  പ്രസിഡന്റ് പാലക്കുന്നിൽ കുട്ടി അധ്യക്ഷനായി. ജനറൽ സെക്രട്ടറി യു. കെ. ജയപ്രകാശ്, കെ. ഇബ്രാഹിം , കൃഷ്ണൻ മുദിയക്കാൽ, പി. വി. കുഞ്ഞിക്കണ്ണൻ, കെ. പ്രഭാകരൻ, നാരായണൻ കുന്നുമ്മൽ, സി. ആണ്ടി, എ. കെ. അബ്ദുല്ലകുഞ്ഞി, എൻ.വി. കുമാരൻ എന്നിവർ പ്രസംഗിച്ചു. മർച്ചന്റ് നേവി ജീവനക്കാരുടെ ദേശീയ സംഘടനയായ നുസിയുടെ ശതവാർഷികത്തിന്റെ  ഭാഗമായി 1996 മുതലാണ് നവംബർ 6 ന് ‘സീമെൻസ് യൂനിറ്റി ഡേ’യായി ആഘോഷിച്ചു വരുന്നത്. മുൻ ജനറൽ സെക്രട്ടറി ഡോ. ലിയോ ബാൻസിന്റെ ജന്മദിനമാണത്.
 സർക്കാരിൽ നിന്ന് നേരിയ തുക പോലും  പ്രതിമാസ ക്ഷേമപെൻഷനായി ലഭിക്കാത്ത കപ്പലോട്ടക്കാർക്ക്  ക്ഷേമപ്രവർത്തനത്തിന്റെ ഭാഗമായി ധനസഹായം നൽകിവരുന്നത്  രാജ്യത്ത് ഇവിടെ മാത്രമാണ്. പ്രാദേശികമായി സംഘടിച്ചു സ്വന്തമായി കെട്ടിടവും ഓഫീസുമുള്ള രാജ്യത്തെ  കപ്പൽ ജീവനക്കാരുടെ പ്രഥമ കൂട്ടായ്മയാണിത്. അവരുടെ  ക്ഷേമ പ്രവർത്തങ്ങൾക്ക് മുൻതൂക്കം നൽകി  പ്രവർത്തിക്കുന്ന കോട്ടിക്കുളം  മർച്ചന്റ് നേവി ക്ലബ്ബിന് യു. കെ. യിലെ സതാംപ്ട്ടൻ ആസ്ഥാനമായുള്ള സൈലർസ് സൊസൈറ്റിയുടെ ബെസ്റ്റ് പെർഫോമർ അവാർഡ് കിട്ടിയ രാജ്യത്തിലെ ഏക ക്ലബ്. 
2023 November 6Keralaഉദിനൂർ സുകുമാരൻtitle_en: Meeting of sailors to share memories