എറണാകുളം: കനിവ് 108 ആംബുലൻസ് ജീവനക്കാരുടെ പരിചരണത്തിൽ അതിഥി തൊഴിലാളി യുവതിക്ക് വീട്ടിൽ സുഖ പ്രസവം. അസം സ്വദേശിനിയും നിലവിൽ പെരുമ്പാവൂർ കുറ്റിപ്പാടം അല്ലപ്പ്ര താമസവുമായ ജനത പഹരിയ(24)യാണ് വീട്ടിൽ പെൺകുഞ്ഞിന് ജന്മം നൽകിയത്. ശനിയാഴ്ച രാവിലെ എട്ടരയോടെയാണ് സംഭവം.
ജനതയ്ക്ക് പ്രസവവേദന അനുഭവപ്പെട്ടതിനെ തുടർന്ന് ബന്ധുക്കൾ വിവരം പെരുമ്പാവൂർ താലൂക്ക് ആശുപത്രിയിലെ ജൂനിയർ പബ്ലിക് ഹെൽത്ത് നഴ്സായ പ്രിയയെ അറിയിച്ചു. തുടർന്ന് പ്രിയ കനിവ് 108 ആംബുലൻസിൻ്റെ സേവനം തേടുകയായിരുന്നു. കൺട്രോൾ റൂമിൽ നിന്ന് അത്യാഹിത സന്ദേശം പെരുമ്പാവൂർ താലൂക്ക് ആശുപത്രിയിലെ കനിവ് 108 ആംബുലൻസിനു കൈമാറി.
ആംബുലൻസ് പൈലറ്റ് വിനോദ് പി.വി, എമർജൻസി മെഡിക്കൽ ടെക്നീഷ്യൻ സനീഷ് ചന്ദ്രൻ എന്നിവർ ഉടൻ സ്ഥലത്തെത്തി. തുടർന്ന് എമർജൻസി മെഡിക്കൽ ടെക്നീഷ്യൻ സനീഷ് ചന്ദ്രൻ നടത്തിയ പരിശോധനയിൽ പ്രസവം എടുക്കാതെ ജനതയെ ആംബുലൻസിലേക്ക് മാറ്റാൻ കഴിയില്ല എന്ന് മനസിലാക്കി വീട്ടിൽ തന്നെ ഇതിനുവേണ്ട സജ്ജീകരണങ്ങൾ ഒരുക്കി.
8.59ന് എമർജൻസി മെഡിക്കൽ ടെക്നീഷ്യൻ സനീഷ് ചന്ദ്രൻ്റെ പരിചരണത്തിൽ ജനത കുഞ്ഞിന് ജന്മം നൽകുകയായിരുന്നു. തുടർന്ന് സനീഷ് അമ്മയും കുഞ്ഞും തമ്മിലുള്ള പൊക്കിൾകൊടി ബന്ധം വേർപ്പെടുത്തി ഇരുവർക്കും വേണ്ട പ്രഥമ ശുശ്രൂഷ നൽകി ആംബുലൻസിലേക്ക് മാറ്റി. ഇരുവരെയും ഉടൻ ആംബുലൻസ് പൈലറ്റ് വിനോദ് പെരുമ്പാവൂർ താലൂക്ക് ആശുപത്രിയിൽ എത്തിച്ചു. അമ്മയും കുഞ്ഞും സുഖമായി ഇരിക്കുന്നതായി ബന്ധുക്കൾ അറിയിച്ചു.
കനിവ് 108 ആംബുലൻസ് ജീവനക്കാരുടെ പരിചരണത്തിൽ അതിഥി തൊഴിലാളി യുവതിക്ക് വീട്ടിൽ സുഖ പ്രസവം
Byadmin
Nov 4, 2023