‘ലാൽ സലാം’ ചിത്രത്തിന്റെ റിലീസ് പ്രഖ്യാപിച്ചു

വിഷ്ണു വിശാൽ, വിക്രാന്ത് സന്തോഷ് എന്നിവർ കേന്ദ്രകഥാപാത്രങ്ങളായി എത്തുന്ന ‘ലാൽ സലാം’ എന്ന ചിത്രത്തിന്റെ റിലീസ് പ്രഖ്യാപിച്ചു. ഐശ്വര്യ രജനികാന്ത് സംവിധാനം ചെയ്യുന്ന ചിത്രത്തിൽ രജനികാന്ത് അതിഥി വേഷത്തിലെത്തുന്നുണ്ട്. മൊയ്തീൻ ഭായ് എന്ന കഥാപാത്രത്തെയാണ് രജനികാന്ത് അവതരിപ്പിക്കുന്നത്.
2024 പൊങ്കലിന് ചിത്രം തിയേറ്ററുകളിലെത്തും. സ്‌പോർട്‌സ് ഡ്രാമ വിഭാഗത്തിൽപ്പെടുന്ന ചിത്രമാണ് ലാൽ സലാം എന്നാണ് വിവരങ്ങൾ. എ.ആർ റഹ്മാനാണ് ചിത്രത്തിന് സംഗീതമൊരുക്കുന്നത്.
ചിത്രത്തിൽ ഇന്ത്യൻ ക്രിക്കറ്റ് ടീം മുൻ ക്യാപ്റ്റൻ കപിൽദേവും അഭിനയിക്കുന്നുണ്ട്. കപിൽദേവിനൊപ്പം പ്രവർത്തിക്കുന്നതിനെ താൻ ബഹുമതിയായി കാണുന്നതായി രജനീകാന്ത് പറഞ്ഞിരുന്നു. എട്ട് വർഷങ്ങൾക്ക് ശേഷമാണ് ഐശ്വര്യ രജനികാന്ത് ചിത്രം സംവിധാനം ചെയ്യുന്നത്. ചിത്രത്തിന്റെ തിരക്കഥയും ഐശ്വര്യയുടേതാണ്.