പലരുടെയും ദൈനംദിന ജീവിതത്തെ ബുദ്ധിമുട്ടിലാക്കുന്ന ഒന്നാണ് മലബന്ധം. മലബന്ധത്തിന് പല കാരണങ്ങളും ഉണ്ടാകാം. ആവശ്യത്തിന് നാരുകൾ അടങ്ങിയ ഭക്ഷണങ്ങള്‍ കഴിക്കാതിരിക്കുക, ആവശ്യത്തിന് വെള്ളം കുടിക്കാതിരിക്കുക, ശാരീരിക പ്രവർത്തനങ്ങളുടെ അഭാവം, അല്ലെങ്കിൽ ചില മരുന്നുകൾ എന്നിങ്ങനെ പല ഘടകങ്ങളും ഈ പ്രശ്നത്തിന് കാരണമാകുന്നു. മലബന്ധത്തെ ചെറുക്കാൻ സഹായിക്കുന്ന ഭക്ഷ്യവസ്തുക്കളെ പരിചയപ്പെടാം
ഉച്ചഭക്ഷണത്തിനു ശേഷം പൊടിച്ച ശർക്കരയും നെയ്യും തുല്യ അളവില്‍ യോജിപ്പിച്ച് കഴിക്കുക. ശർക്കരയിൽ ഇരുമ്പ് അടങ്ങിയിട്ടുണ്ട്. നെയ്യില്‍ അവശ്യ കൊഴുപ്പുകളും ഉണ്ട്. ഈ കോമ്പിനേഷന്‍ സുഗമമായ ദഹനത്തെ പ്രോത്സാഹിപ്പിക്കുകയും മലബന്ധത്തെ അകറ്റുകയും ചെയ്യും. കൂടാതെ ഇവ പോഷകങ്ങളുടെ ആഗിരണം വർധിപ്പിക്കുകയും ശരീരത്തിൽ നിന്ന് വിഷവസ്തുക്കളെ കാര്യക്ഷമമായി ഇല്ലാതാക്കാൻ സഹായിക്കുകയും ചെയ്യുന്നു.
നിർജ്ജലീകരണമാണ് പലപ്പോഴും മലബന്ധത്തിന് കാരണമാകുന്നത്. അതിനാല്‍ ഉയർന്ന ജലാംശമുള്ള തണ്ണിമത്തൻ കഴിക്കുന്നത് നിർജ്ജലീകരണം അകറ്റാനും അതുവഴി വണ്ണം കുറയ്ക്കാനും സഹായിക്കും. വൈകുന്നേരത്തെ ലഘുഭക്ഷണമായി തണ്ണിമത്തൻ കഴിക്കാം. തണ്ണിമത്തൻ സീസണിലല്ലെങ്കിൽ, പഴുത്ത വാഴപ്പഴം കഴിക്കുന്നതും നല്ലതാണ്.
അത്താഴത്തില്‍ എള്ള് ഉൾപ്പെടുത്തുന്നതും മലബന്ധം അകറ്റാന്‍ സഹായകമാണ്. ഫൈബര്‍, വിറ്റാമിൻ ഇ, അവശ്യ ഫാറ്റി ആസിഡുകൾ എന്നിവ എള്ളില്‍ അടങ്ങിയിട്ടുണ്ട്. ഇവയെല്ലാം ദഹനപ്രക്രിയയെ സുഗമമാക്കുന്നു. മലബന്ധം ഒഴിവാക്കുന്നതിനൊപ്പം ഇവ മൊത്തത്തിലുള്ള കുടലിന്റെ ആരോഗ്യം പ്രോത്സാഹിപ്പിക്കുന്നതിനും വളരെയധികം സഹായിക്കും.
