എസ്.എസ്.എൽ.സി ഫലം ജൂൺ 15 ഓടെയും ഹയർ സെക്കൻഡറി ഫലം ജൂൺ 20 ഓടെയും പ്രഖ്യാപിക്കുമെന്ന് പൊതുവിദ്യാഭ്യാസ മന്ത്രി വി. ശിവൻകുട്ടി. 2022-23 അധ്യയനവര്‍ഷത്തെ സൗജന്യ കൈത്തറി സ്കൂൾ യൂനിഫോമിന്‍റെ സംസ്ഥാനതല വിതരണോദ്ഘാടനം നടക്കാവ് ജി.വി.ജി.എച്ച്.എസ് സ്‌കൂളില്‍ നിർവഹിക്കുകയായിരുന്നു അദ്ദേഹം.
ഹയർ സെക്കൻഡറി, വൊക്കേഷനൽ ഹയർ സെക്കൻഡറി ഒന്നാം വർഷ പരീക്ഷകൾ പരിഗണിച്ച് നേരത്തേ നിശ്ചയിച്ച എൻ.എസ്.എസ് ക്യാമ്പുകൾ മാറ്റിവെച്ചതായും മന്ത്രി പറഞ്ഞു. സര്‍ക്കാര്‍ സ്കൂള്‍ വിഭാഗത്തിൽ ഒന്ന് മുതല്‍ ഏഴുവരെ ക്ലാസിൽ പഠിക്കുന്നവർക്കും എയ്ഡഡ് സ്കൂള്‍ വിഭാഗത്തിൽ എല്‍.പി ക്ലാസുകാർക്കും സൗജന്യ കൈത്തറി യൂനിഫോം നൽകും.
3,712 സര്‍ക്കാര്‍ സ്കൂളുകളിലും 3,365 എയ്ഡഡ് സ്കൂളുകളിലും അടക്കം ആകെ 7,077 സ്കൂളുകളിലെ 9,58,060 കുട്ടികള്‍ക്കാണ് കൈത്തറി യൂനിഫോം നല്‍കുന്നത്. ആകെ 42.08 ലക്ഷം മീറ്റര്‍ തുണിയാണ് വിതരണം ചെയ്യുന്നത്. ഈവർഷം 120 കോടി രൂപയാണ് കൈത്തറി യൂനിഫോം പദ്ധതിക്കായി ചെലവഴിക്കുന്നത്.